SECTIONS
Sunday , June 24, 2018
BACOLOD

Ulo nalata

HALOS malata ang ulo ug migawas ang sulod sa parte niini dihang nahulogan og mokabat 30 ka mga fiber glass ang usa ka trabahante niadtong Sabado mga alas 12:00 sa udto sa construction site sa usa ka mall sa dalan Capt. Vicente Roa ning siyudad sa Cagayan de Oro.

Si Deputy Station Commander Police Inspector Dominador Orate sa Police Station 2 (PS2) sa Cogon niila sa biktima nga mao si Ramil Mugot, 23, ulitawo, residente sa Barangay Bugo ning siyudad ug giingong igo lamang nga nag-sideline sa pag-haul niadtong tungora sa delivery truck nga kargado og fiber glass nga gipanag-iyahan sa SAGS glass supply.

Sa inisyal nga imbestigasyon, nasuta nga ikanaog na unta ang maong mga fiber glass alang sa maong mall apan kalit gipaandar sa driver nga si Kim Napone ang truck nga miresulta sa pagkaluros sa mga fiber glass ug si Mugot nga anaa sa ubos naghakot niini maoy nahulogan.

Ang mga fiber glass adunay kalapdon ug katas-on nga 6x7 ug mokabat 30 ka buok hinungdan sa grabeng kadaot sa ulo sa biktima. Gani namatikdan nga namilit pa ang mga bildo sa ulo niini.

Samaran sa insidente ang laing mga kauban nga mao sila si Felipe Tumaguin 23, ug Rey John Macabale 23, ulitawo, pulos residente sa Macabalan ning siyudad.

Anaa na sa luwas nga kahimtang si Macabale samtang si Tumaguin ang pabiling giobserbahan sa Cagayan de Oro Medical Center.

Sa iyang bahin ni PO3 Nestor Borjal sa Roads and Traffic Administration (RTA), niingong nga detinado ang driver sa truck kinsa unang niingon nga wala siyay salaod sa insidente ug purely accidental kini.

Ang driver walay lisensya ug pila na ka tuig nga expired ang rehistro sa truck.

Hinuon ang tigdumala sa maong mall nipasalig nga moabaga sa panginahanglanon sa mga biktima.

Daghan ang mikwestyon nganong walay mga gamit o hardhat ang mga pipila ka mga trabahante nga dilekado man kini sa ilang trabaho.

Samtang daghan sa mga motorista ang mireklamo tungod sa giingong daw gusto i-close sa mga security guard sa maong mall ang maong dalan sa Capt. V. Roa human nila kini gikordon.

Pipila usab ka mga sakop sa media nga mikober sa maong insidente ang wala gitugotan nga magkuha og hulagway, magkuha og video ug uban pa. Gidili usab sila sa pagbutyag kalabot sa insidente.

Daghan ang miingon nga kini usa ka dakong interest sa publiko ug dili angayan nga itago labina kung aksidente lamang ang hitabo. Ang kaso padayon pa nga giimbestigahan ning panahona.


VIEW COMMENTS