SECTIONS
Thursday , June 21, 2018

Tambagi ko Noy Kulas: Makigbalik

Dear Noy Kulas,

Tawga lang ko og Lando, minyo unta pero gibiyaan sa asawa kay nikuyog sa laing lalake nga iyang kanhi uyab sa wa pa mi magkaila ug magkauyab.

Aron mabuhi ang among duha ka mga anak, nanimpa­lad ko diri sa abroad. Swerte kaayo ko kay maayo ang dagan sa akong trabaho ug maayo ang sweldo. Maayo usab naka manage sila si Nanay ug akong igsuon sa allotment nga akong gipadala kay hinayhinay ming nakapatukod og balay.

Karon tungod sa Facebook, nagparamdam ang akong asawa diri nako. Nagsige og pm nako ug manawag pa pero wa nako tubaga. Gusto siyang makigbalik nako kay nakaamgo na kuno siya nga ako ang iyang love kuno. Nangayo na siya og pasaylo sa iyang gibuhat. Ang akong pamilya supak nga makigbalik ko, bisan ang among mga anak kay nauwaw sila sa gibuhat sa ilang inahan.

Ako sa akong bahin naglibog ko. Until now wa ko manguyab kay love gihapon nako ang akong misis. Noy, unsa kaha ang akong buhaton? Dawaton ba nako siya og balik bisan sa iyang sala ug bisan supak ang akong pamilya? Please tambagi tawon ko. Daghang salamat.

LANDO

Lando,

Ayaw og desisyon nga imoha ra kay sa imong kasakit human ka biyai, duna kay kasawo. Giunongan ug gisuportahan ka sa imong pamilya, busa agda usab ang ilang desisyon. Kay what if makigbalik ka unya molikoy na usab ang imong asawa, naa pa kaha mosuporta kanimo ang imong pamilya?

Kon akoy pangutan-on, lisod baya ang pagpahibalik sa pagsalig sa usa ka tawo, bisan imo ning gihigugma. Tuod malipay kang makig-uban kaniya, apan moabot gyud ang higayon nga maghuna-huna ka nga nakigdulo siya sa laing lalake. Bisan unsaon pa nimo sa pagpatigbabaw sa gugma, kanang huna hunaa mosantop usahay sa imong huna-huna. Mosangko na sab ni sa inyong away. Mao ni ang sagad mahitabo sa mga sitwasyon nga sama sa imoha.

Ikaduha, di na angay kompyansahan ang tawo nga ingon niana. Dako ang posibilidad nga kon iya ning nabuhat kanimo sa miagi, way garantiya nga di na siya mobalik sa laing lalake or mo engage og relationship sa lain. Kana maoy hinuktoki og maayo.

Basta ayaw lang ikonsiderar ang imong feeling, ilakip usab ang imong pamilya sa bisan unsa nga desisyon nga imong makab-ot.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)


VIEW COMMENTS