MARAGUSAN, ComVal Province - Nangayo og tabang sa kapulisan ang magtiayon nga negusyante human nahanaw ang ilang salapi didto sa Purok Secret Love, Barangay Tigbao.
Alas 3:00 sa hapon niadtong Dominggo, midangat sa Maragusan Municipal Police Station si Mr. Jovito Pacete ug asawa nga si Lina Pacete, nagpuyo sa Purok Secret Love, Barangay Tigbao, Maragusan.
Gisaysay sa magtiayon nga alas 12:30 sa hapon niadtong Oktubre 31, 2017 kalit nga miulbo ang kalayo sulod sa ilang lawak.
Human nakontrolar ang kalayo, ilang namatikdan nga nahanaw na ang P1,100,000 nga salapi.
Ang salapi gisulod sa bag nga itom ang bulok sulod sa ilang lawak.
Namatikdan sab sa mga biktima nga naguba ang kisame sa ilang lawak gikan sa ikaduhang andana sa panimalay.
Nagduda ang mga biktima nga ang panday nga nagtrabaho sa ikaduhang andana sa ilang panimalay ang suspek sa insidente.
Ang panday nagtrabaho sa ikaduhang andana atol sa sunog.
Ang imbestigasyon sa Bureau Of Fire Protection - Maragusan nagbutyag nga dili electrical short circuit ang hinungdan sa sunog.
Nag-alayon karon ang Maragusan Fire Station ug Maragusan Municipal Police Station sa usa ka halawom nga imbestigasyon sa insidente.