MONTEVISTA, ComVal Province - Nadala sa balay tambalanan ang usa ka retiradong pulis human siya gipusil didto sa Purok 2, Barangay Poblacion, alas 7:45 sa buntag, Biyernes.
Biktima giila nga mao si retired Senior Police Officer 3 Noel E. Molijon, 58, nagpuyo sa Purok 6, Barangay Poblacion, Montevista.
Base sa imbestigasyon sa Montevista Municipal Police Station, ang biktima nagmaneho sa iyang motorsiklo gikan sa iyang uma. Usa ka wala mailhing lalaki ang nagtindog kilid sa karsada ang kalit nga mipusil sa biktima sa makadaghang higayon.
Luyo sa nahiagom nga samad pinusilan, nakamaneho pa gihapon sa iyang motorsiklo ang biktima ug nangayo og tabang sa mga lumulupyo sa lugar.
Gilayong gisapupo ang biktima ug gidala ngadto sa Compostela Valley Provincial Hospital sa Barangay Bankerohan Sur, Montevista.
Sa pagproseso sa dapit sa nahitaboan, narekober sa kapulisan ang tulo ka basiyo sa bala sa kalibre .45 nga pistola.
Naglusad na og intelligence operation ang Montevista Municipal Police Station aron mailhan ang suspek sa krimen.
Ang biktima kanhi nadestino sa Montevista Municipal Police Station.