PANTUKAN, ComVal Province - Patay ang duha ka minero human gipusil didto sa Pulang Lupa, Sityo Boringot, Barangay Napnapan, alas 11:00 sa gabii, Huwebes.
Mga biktima giila nga mao si Isty M. Quiay ug Jeje Santua, nagpuyo sa Pantukan.
Base sa imbestigasyon sa kapulisan, nga mga biktima natulog sulod sa ilang bunkhouse dihang mibutho ang siyam ka mga armadong lalaki.
Gipusil sa mga suspek ang mga biktima gamit ang wala pa matinong kalibre sa pusil. Human sa pagpamusil ang mga suspek paspas nga miiktad paingon sa wala matinong direksiyon.
Usa ka lalaki nga nakasaksi sa pagpamusil ang nag-ila sa mga suspek.
Ala 1:30 sa hapon niadtong Biyernes naglusad og follow up operation ang Pantukan Municipal Police Station human nakadawat og tawag nga ang mga suspek mibiyahe gikan sa Pulang Lupa, Sityo Boringot, Barangay Napnapan paingon sa Kingking, Pantukan.
Nadakpan ang mga suspek nga si Jomer L. Lariwan, Jhunrey S. Lariwan, John Ralph Almeñe ug Motin Matarab, parehong nagpuyo sa Purok Manggapispis, Sityo Boringot, Barangay Napnapan, Pantukan.
Mga suspek gikustodiya sa Pantukan Municipal Police Station ug gitakda nga pasakaan og kaso.