MONTEVISTA, Comval Province – Patay ang konsehal sa lungsod samtang kritikal ang kondisyon sa iyang kauban human gipusil didto sa Purok 8, Barangay San Jose.
Ang insidente nahitabo alas 7:00 sa gabii niadtong Miyerkules, Disyembre 27, 2017.
Si Police Senior Inspector Ariel C. Pascual, hepe sa Montevista Municipal Police Station, nag-ila sa mga biktima nga mao si Jobert Delos Reyes Matugas, 31, minyo, miyembro sa Sangguniang Bayan sa Montevista, nagpuyo sa Purok 8, Barangay San Jose, Montevista ug Jerwin O. Reconada, 23, nagpuyo sa Purok 4, Barangay New Dalaguet, Montevista, Compostela Valley.
Ang pasiunang imbestigasyon sa Montevista Municipal Police Station nagbutyag ang duha ka mga biktima anaa sa panimalay dihang miabot ang duha ka wala mailhing mga mamumuno.
Walay daghang estorya gipusil sa mga suspek ang mga biktima sa makadaghang higayon.
Nahiagom sa mga samad pinusilan sa nagkadaiyang parti sa ilang lawas ang mga biktima.
Human sa pagpamusil ang mga suspek paspas nga miigtad paingon sa wala matinong direksiyon.
Gilayong naglusad og pursuit operation ang Montevista Municipal Police Station.
Nagmuntar sab og checkpoint ang kapulisan ug kasundalohan sa mga dalan diin posibleng moagi ang mga suspek apan wala na igkita.
Daling gisapupo ug gidala ngadto sa Compostela Valley Provincial Hospital sa Barangay Bankerohan Sur, Montevista ang mga biktima.
Gisuwayan pag-revive sa mga doctor si Konsehal Matugas apan gideklara nga patay na pinaagi ni Dr. Nasser Jawadil.
Gilahos sab sa Davao Regional Medical Center sa Apokon, Tagum City, Davao del Norte si Jerwin Reconada alang sa dugang medikasyon.
Sa pagproseso sa crime scene nakarekober ang kapulisan og pito
ka basiyo sa bala sa .45 nga pusil.
Hangtud sa pagsuwat niining balita, wala pay natumbok nga suspek ang kapulisan busa nagpadayon pa ang ilang imbestigasyon.