SECTIONS
Sunday , June 24, 2018

Sugilanon: Bag-ong tuig sa bag-ong kalibutan

Lamberto G. Ceballos
Cawayan, Dalaguete, Cebu

UNTOP alas dose sa tungang gabii sa Disyembre 31 dihang misamot ang kaalingisig sa palibot, isip paghangop sa Bag-ong Tuig. Hilom nga mibiya ang Daang Tuig kay wa nay naninagad niya. Way puas ang paka-paka sa mga rebentador ug buto-buto sa ubang pabuto didto sa mga tugkaran sa ilang mga silingan. Misulbong gikan sa kapilya sa ilang sityo ang mga kuwitis nga gipabuto sa mga batan-on. Ang mga gagmayng bata nagbudyong sa ilang mga torotot. Apan wa makita ni Pektoy ang kangaya sa takna diha sa sud sa ilang gipuy-ang barungbarong. Si papa niya Emok ug si mama niya Eka ug si manang niya Inday Almie diha sa lamesa, nangaon sa pagkaon nga giandam ni mama niya alang sa Media Noche. May bakanteng lingkuranan tupad ni manang niya. Diha say basiyo nga plato sa tungod.

“Wa gyud kapaabot si Pektoy, uy, sa Bag-ong Tuig!” ni Mama Eka nga mitibi ang baba.

“Bitaw, Ma, no! Duha ra man unta ka semana dayon Bag-ong Tuig na,” ni Inday Almie. “Wa sad gani siya ka-pamasko.”

“Ayna lang ninyo hisguti ang paglakaw ni Pektoy,” misagbat si Papa Emok. “Mosamot lang atong kaguol niana!”

Kahilakon si Pektoy nga namati sa iyang pamilya nga naghisgot sa iyang paglakaw. Unsaon man sad god niya nga nasakit man siyag dengue? Na-ospital siya, apan wa siya kasugakod sa sakit bisan pa sa mga tambal nga gidapat kaniya. Mikuyog na lang siya sa tawo nga nagsul-ob og itom ug nagkawo og itom nga miagbay kaniya. Gidala siya sa tawo ngadto sa dapit diin malipayon ang mga bata. May mga bata nga sama niyag edad, singko anyos. May mga maguwang niyag edad ug may mga manghod pod. “Anhi ko ikaw biayi, Pektoy. Mao ni ang bag-o mong kalibutan,” miingon ang tawo nga nagsul-ob og itom. Apan nagmasulob-on siya didto. Kanunay siya mahinumdom sa iyang mama, papa ug maguwang nga babaye.

Usa ka higayon giduol siya sa usa ka matahom nga babaye nga taas og buhok ug nagsul-ob og puting sinina. Naglingkod siya sa marmol nga lingkuranan diha sa hardin sa dako kaayong balay nga puti.

“Nganong nag-inusara ka dinhi, Pektoy?” matod sa matahom babaye. “Apil sa duwa sa mga bata didto, o!” Gitudlo sa babaye ang mga bata nga nanagduwa. May nagginukdanay. May nagpasahay og bola. Ug may nagsayaw-sayaw. Ang ilang mga sinina pulos puti sama sa kang Pektoy.
  
“Nahinumdom man god ko nilang Mama Eka, Papa Emok ug Manang Almie, M’am!” tug-an ni Pektoy. “Gusto unta ko moduaw nila inigka Bag-ong Tuig.”

Mitutok ang matahom babaye kaniya, unya miingon, ”O, sige. Ubanan tika sa inyo. Pero di ta magdugay didto, ha? Masuko unya si God kon magdugay ta.”

Misaya ang panagway ni Pektoy. Gigunitan siya sa matahom babaye ug nahidangat sila sa barungbarong nga gipuy-an sa iyang pamilya.

Nahibulong si Almie kay milihok ang bakanteng lingkuranan sa iyang tupad. “Ma, Pa, dia si Pektoy, Naa milingkod sa iyang lingkuranan.”

Mitan-aw sila Eka ug Emok sa lingkuranan ni Pektoy. Naglihok tuod. Nakita pod nila nga ang basiyong plato sa tungod niini daw giduso padung kang Eka, sama sa buhaton kaniadto ni Pektoy kon mangayo pag dugang nga sud-an sa iyang inahan.

“Huhuhu! Dong Pektoy, salamat nga miari ka! Gikasalo ka gihapon namo sa Media Noche!” mitiyabaw si Eka.

Unya daw may mihuros nga bugnawng hangin gikan sa sulod sa barungbarong paingon sa gawas sa bentana. Mihunong ang paglihok sa bakanteng lingkuranan. Mibakho si Eka.

Didto sa bag-o niyang kalibutan malipayon na si Pektoy nga nakigduwa sa ubang mga bata. (Katapusan)


VIEW COMMENTS