SECTIONS
Sunday , June 24, 2018

P12 minimum nga pleti pangayuon

GIKAN sa kasamtangang P6.50 nga pletehan sa jeep sa unang lima ka kilometro, gusto sa mga driver ug operator nga himuon kining P12 kon hingpit na nga mapatuman ang excise tax sa krudo.

Ang pangu sa Cebu Integrated Transport Cooperative (CITRASCO), Ryan Benjamin Yu, nibutyag kagahapon nga nga giandam na nila ang mga dokumento aron isumiter sa Land Transportation Franchising and Regulatory Board (LTFRB) sa panahon nga mapatuman na ang maong balaod ug mapatungan og dugang buhis ang krudo sa nasod.

Gipaabot nga pasakaan sa mga kompaniya sa lana ang presyo sa produktong petrolyo sa pagpatuman sa buluhisan ubos sa Tax Reform for Acceleration and Inclusion (TRAIN) sa administrasyon ni Presidente Rodrigo Duterte.

“Basically, within this month once ang excise tax on fuel will be implemented, mag-file ta diretso og fare increase (petition) for PUJ. Ato nanang giandam karon, were looking at maxi­mum og P6 ang atong pangayuon nga (umento sa pletihan,” si Yu nagkanayon.

Dugang niya nga aduna’y liboan ka mga miyembro ang Citrasco nga nagpadagan og jeep ug 85 porsyento niini anaa sa dakbayan sa Sugbo.

“Daghan ang naglibog nga drivers. Ang nakasabot, nangahadlok,” kay basin dili na sila sakyan sa mga commuters, si Yu nagkanayon.

Si LTFRB Regional Director Ahmed Cuizon, sa iyang text message sa Superbalita Cebu, niingon nga katungod sa public transport sector ang mangayo og umento.

Andam silang maminaw sa mga sakop sa transport sector.

Apan kinahanglan ipaagi kini og proseso diin ang habig sa mga pasahero ila usab nga paminawon.

“But we will also have to listen to the possible arguments against the petition coming from jeepney passengers as maybe represented by basic sectors of community such as the workers, students, senior citizens and the urban poor,” matod ni Cuizon.

Ang resulta sa hearing ilang iduso sa ilang ulohang buhatan alang sa desisyon.

Sa pagkakaron, di pa ma­kasulti si Yu sa habig sa taxi tungod kay aduna’y nakaung-ong nga ipatuman nga bag-ong pletehan usab.

Kadtong giaprobahan sa LTFRB nga P40 flag down, P2 kada minuto nga waiting time ug P13.50 kada kilometro nga pletehan.

Dugang ni Yu nga possible nga inig ka human sa Sinulog na kini mapatuman tungod kay i-calibrate pa ang mga metros sa taxi units.

Sa pakisusi sa Superbalita Cebu sa usa ka ilado nga convenient store sa nasod, nisaka na ang softdrinks nga 2 liters diin gikan sa P59, karon anaa na kini sa P76.

Si Roy Saoro, kinsa usa ka tindero atbang sa Brgy. Pahina Central Sports Complex, nibutyag nga nimahal na ang sigarilyo apan wala pa moabot ang delivery niya niadtong nahinabi kini sa Superbalita Cebu.

Gilauman na hinuon niya nga mosaka kini ug matod niini, “paminawon ang dagan sa panahon.”


VIEW COMMENTS