SECTIONS
Monday , June 25, 2018

150 ka balay gisugdan na'g guba

KAGAHAPONG adlawa, ang mga residente sa Barangay 40-D naghinay-hinay na sa pagpananggal sa bungbong ug atop sa ilang mga balay nga magamit pa human sila maapil sa kategorya sa "danger zone" gumikan duol kini sa Davao River.

Ang City Engineering's Office maoy mitabang sa pagbungkag sa 150 ka mga balay nga nasulod sa first batch sa pag-demolish.

Dungan niini, ang Office of Civil Defense (OCD)-Davao nagrekomenda sa lokal nga kagamhanan sa Davao City nga ihikling ang mga namuyo daplin sa Davao River aron makubsan ang biktima sa baha kung motaas ang tubig sa suba.

Kini ang gisulti ni OCD-Davao director Leoncio Cirunay atol sa AFP-PNP Press Conference sa The Royal Mandaya Hotel, kagahapon.

Sumala ni Cirunay nga girekomenda kini nila ngadto sa Davao diin ang mga namuyo sa subdivisions ug mga resettlement areas ipangbalhin sa lugar nga mas taas aron di maabot sa baha inig lapaw sa tubig sa suba.

Una niini, gibutyag ni Davao City Mayor Sara Duterte-Carpio nga ang pag-demolish sa panimalay sa mga bahaunon nga lugar sama sa Bankerohan giaprubahan na sa the Presidential Commission for the Urban Poor (PUCP).

"Before nahitabo ang baha naa na gyud mi mga notices sa mga danger zones dinha sa Bankerohan, nasango mi kay we need clearance from PUCP but nagkaproblema ang PUCP because of the removal of the tao, pero karon nag-check ko, naa nay clearance sa PUCP," suma sa mayor.

Kabahin sa mandato sa PUCP mao ang pagsusi sa mga proyektong pabalay sa gobyerno sa giilang squatter ug resettlement areas uban sa konsultasyon sa mga benepisyaryong komunidad, ug magrekomenda sa maayong lakang ngadto sa Presidente.

Ang mga lugar nga dunay daghang namuyo daplin sa Davao River mao ang S.I.R, Phase 1; Dapsa Barangay 2-A, Magallanes; Bolton Extension sa Barangay 1-A, porsiyon sa Kasilak Bucana sa Barangay 76-A ug Barangay 40-D: Matina Gravahan sa Barangay Matina Crossing; Barangay 5-A (Bryco, Pag-asa, Litsonan, Detachment, Lower Madapo-Sto. Niño de Suba) sa Barangay 8-A, Lower Madapo (Hollow blocks, Panal Village); Barangay 10-A Domsat; porsyon sa Barangay Ma-a; Barangay 19-B El Rio; ug sa Jde Valley sa Barangay Tigatto.

Si Duterte-Carpio nagkanayon nga iya nang gimandoan ang administrador ning siyudad nga demolison na sa Enero 2018.

"Ingon ko sa city administrator's office nga mag-offer lang sila og misa sa San Pedro nga walay baha nga mahitabo from now until December 31, and mag-demolish sila after January 1," sulti sa mayor.

Dugang niya nga ang City Housing natapos na sa tagging sa mga lugar nga mokuwalipika sa relocation sa Los Amigos.


VIEW COMMENTS