NILUWAT sa iyang katungdanan isip bise mayor sa Davao ang kinamagulangang anak ni Presidente Rody Duterte nga si Paolo "Polong" Duterte niadtong bulan sa Disyembre.
Gikakurat kini sa iyang mga supporters apan gikahimuot ug gikalipay sa kontra partido nga gitawag karon og mga "dilawan," "yellowtards" ug oposisyon.
Alang sa mga supporters, walay napamatud-ang sala sa ilang lodi samtang ang dilawan nibatikos nga sad-an ang Bise Mayor sa isyu sa naghitak nga smuggling sa Bureau of Customs ug sa gidili nga druga.
Sa akong nakalap nga balita, nakahibalo na si Mayor Inday Sara sa buhaton sa iyang Manoy busa atua kini sa Sangguniang Panlungsod sa dihang gianunsyo ni Polong ang iyang pagluwat sa hinungdang personal ug trabaho.
Naduhigan kuno ang iyang dungog sa pasangil kaniya ni Senador Antonio Trillianes IV nga siya ang nagpaluyo sa "Davao Group" nga nagpalusot og daghang kontra-bando sa Pilipinas nga gisalida sa nasudnong TV. Natandog daw usab siya sa gipakitang gawi ug batasan sa iyang "pasaway" nga anak nga babaye sa una niyang asawa sa ilang pagsinukliay og mahait nga pulong sa social media.
Buot niyang limpyuhan ang iyang dungog ug isip bugtaw sa delicadeza kinahanglang moluwat siya sa puwesto aron dili tawagong "kapit-tuko" ug nagsalig sa iyang presidente nga amahan.
Karong bag-o lang, gibalitang gidawat sa Palasyo sa Malacanang ang iyang pagluwat. Apan unsa man kining "delicadeza"?
Akong gilantaw sa libro ang hubad niini ug akong nasayran nga pulong kini nga Espanol ug walay tukmang hubad sa Bisaya. Ang pinakaduol niini kay "nakonsiyensiya" ug "gigukod sa iyang tanlag."
Nagginukdanay tingali sulod sa ulo ug dughan sa hingtungdan ang pag-resign ug dili pag-resign, kaulaw o pabagaay sa nawong, kapit-tuko o ambak pare, kapit sa patalim o putol liog."
Sa katapusang adlaw ni anhing Presidente Marcos sa Malacanang sa 1986 diin andam nang mosulod ang nag-rally sa Mediola ngadto sa Malacanang ug nagbahis-bahis na sa ibabaw ang US fighter jets, gitawagan siya sa telepono ni kanhi Presidente Ronald Reagan sa Amerika nga "cut cleanly Ferdie, cut cleanly!" nga buot ipasabot, "ayaw na'g palag Ferdie, lakaw na sa hilom."
Kung akoy pahubaron, tawagon ko ang "delicadeza" sa isyu sa Bise Mayor og "ayaw na'g palag Polong, lakaw na sa hilom."
Apan para kanako nakaayo sa batan-ong Duterte ang resulta sa bugtaw sa iyang delicadeza. Una sa tanan, gipakita niini nga makamao siya motindog sa kaugalingon ug wala magsalig sa iyang amahan.
Ikaduha mao ang pagrespeto niya sa proseso sa hudikatura ug politika apil na ang paghatag og higayon sa mga imbestigador sa pagsuta nga may kalambigitan siya sa smuggling.
Ang ikatulo nga akong nakitang maayong resulta mao ang paghatag sa kanhi Bise Mayor og panahon sa iyang kaugalingon ug iyang pamilya nga mamalandong sa ilang kinabuhi isip politiko ug pangulo sa pamilya.
Para kanako, tulin ra kaayo ug dili andam si Polong sa iyang naangkong politikanhong posisyon nga nadala ra sa bansagon ug hilabihang papularidad sa iyang amahan ug igsuong mayor.
Sa pagkakaron, may nagpahipi apan nagkakusog nga pangutana sa palibot nga "wala na bay laing lider ang Davao?"