SECTIONS
Sunday , June 24, 2018

Editoryal: Di ang pag-ban

HUMAN sa pagkasunog sa Metro Ayala department store, nagplano si Cebu City Mayor Tomas Osmeña sa kasamtangang pag-ban sa pagtukod og mga high-rise building sa kabalaka nga kon dunay mahitabo nga sunog, mangatanggong ang mga nag-ukopar.

Gusto sa mayor nga maghimo unag mga lakang nga magseguro nga luwas ug seguradong makalingkawas ang mga nagpuyo o daling masanta ang sunog. Nagtuo siya nga mahimong fire trap ang tag-as nga mga building.

Dunay kapasikaran ang mayor sa iyang kabalaka tungod kay naglisod gani ang kabomberohan sa pagpawong sa kayo sa unom lang ka andana nga department store, unsa na kaha kon tag-as nang mga edipisyo ang maigo?

Pila ra usab kaha ka mga trak sa kabomberohan nga dunay igong hagdanan ang makaabot sa tag-as nga mga floor sa high-rise nga mga building?

Klaro nga kuwang pa og mga ekipo ang kabomberohan sa pagkombate sa sunog nga sama sa Metro Ayala, sama sa mga breathing apparatus kun kagamitan sa pagginhawa sa pagsulod og mga dapit diin nagpuot ang aso.

Kon kuwang sa breathing apparatus, unsa na kaha sa ubang mas mahal nga mga ekipo?

Panahon na nga di lang isandig ang tanan sa kagamhanan. Mo­tampo na usab unta ang dagkong mga negusyo, sama sa pag-umol og mga fire brigade, pagpalit og modernong mga ekipo.

Seguraduhon nga ang mga gamit pagpawong og kayo sa matag edipisyo, sama sa sprinklers nga gamit kaayo, mo-function.

Gikinahanglan ang estriktong pagpatuman sa balaud nga gitumong alang sa kaluwasan sa katawhan sud sa mao nga mga edipisyo.

Dunay pasikaranan si Osmeña sa iyang kabalaka, apan ang pag-ban di maoy sulusyon. Sama sa ubang mga nasod, ang paglikay sa pagkahitabo sa sunog ug pagpalambo sa kapabilidad mao ang labing maayong lakang.


VIEW COMMENTS