SECTIONS
Sunday , June 24, 2018

USJ-R/May Abuhan mipildi sa UV-ARQ

Mga duwa karon:
4:30 pm. - UC / M.Lhuillier vs. USJ-R/May Abuhan
6:00 pm. - Bogo/Cebu Land­mas­ter vs. Marinerong Pilipino

HUMAN dabo-dabohi sa Ce­bu Landmasters/Bogo City sa niaging adlaw, ang University of San Jose Recoletos (USJ-R)-May Abuhan kagahapon inanay nga mibangon aron buntogon ang University of the Visayas (UV)-ARQ Builders, 91-80, sa naghinapos nga 2018 Cebu City Sinulog Cup Invitational basketball tournament sa Cebu Coliseum.

Ang rally sa ikaupat nga kuwarter mayo nahimong ganghaan sa USJ-R paingon sa kadaugan nga temporaryong nagwanang paingon ngadto sa finals dala ang 2-1 nga baraha.

Nagkinahanglan sila nga modaog batok sa UC/M.Lhuillier karong hapon sa preliminary game aron pag-angkon sa ikaduhang luna alang sa finals. Ang wa pay pildi nga Cebu Landmasters (3-0) otomatikong nakaangkon sa unang finals seat.

Perming gagukod ang USJ-R ni coach Edito Salacut sulod sa tulo ka quarters. Ang Jaguars miduwa nga wala ang kanhi PBA player nga si Roger Yap tungod sa dili maayong gipamati niini sa dapi-dapi.

“Actually, diha ra gyud mi sa fourth quarter nakaginhawa. Kay sa tulo ka kwarters di man gyud namo sila ma contain. So, mi-adjust mi sa among depensa ug akong gi-gamble nga mag-solid mi,” matod ni Salacut atol sa post-game interview.

Gipasabot ni Salacut nga iyang gi-box-on-one ang shooter sa Tristan Albina ug gihugtan usab niya sa depensa si Rey Suerte. Tuod man nagbunga ang pagsuway ni Salacut sanglit nakahagdaw sila og 16 ka steals sagad niini sa fourth quarter.

Si Miguel Gastador, ang bayani sa ilang pagpukan sa Marinerong Pinoy niadtong Martes, nangulo sa Jaguars nga may 19 puntos, nga gisundan usab sa 14 puntos sa ilang import nga si Kingsley Ewenike.

Ang beteranong si Enrico Llanto mipakli usab og 13 ug midugang usab si Cesafi MVP og 12 puntos.

Sa habig sa UV-ARQ (0-4), si Tristan Albina maoy nangulo nga may 18 puntos, 11 ra usab ang nahimo ni Rey Suerte.

Karong hapon, kadudahan pa kon makaduwa si Yap sa Jaguars.

“Dako man gud og bintaha basta naa si Roger (Yap), kay maplastada man gud ang mga bata. So, maayo unta og makaduwa siya namo ugma (karon),” dugang ni Salacut.

Hangtod ning pagsulat, padayon pang nagkombati ang UC/M.Lhuillier ug ang Marinerong Pinoy nga pulos usab 1-1 ang baraha. (JBM)


VIEW COMMENTS