SECTIONS
Sunday , June 24, 2018

GSW gilubong og taga li-og

MIPABAHA og 50 puntos si Lou Williams ug ang Los Angeles Clippers mipa­kaging sa inilog nga Golden State, 125-106, kagahapon didto mismo sa korte sa Warriors sa Oakland.

Ang Warriors igo lang nakapuntos og 16 sa fourth quarters nga igo na kaayong naghatag sa Clippers sa ika­duhang sunodsunod nga ka­daugan human usab sa duha ka kapildihan.

Sa third period, si Williams mihipos og 27 puntos, nga maoy pinakadako nga score sud sa usa ka quarter sa karon nga season.

Hinuon ang kapildihan sa Golden State gidayandayanan usab sa laing achievement nga nahimo ni Kevin Durant. Kini human sa Durant, ang kanhi most valuable player (MVP) awardee nahimong ika-44 nga NBA player ug ikaduhang pinakabata nga nakatigom og 20,000 points.

Ang Warriors miduwa nga wala ang ilang superstar nga si Steph Curry tungod sa injury tikod niini ug si Klay Thompson kinsa gipapahuway sa maong duwa.

Si Durant kinsa hatagan ra unta og limitadong oras, napugos sa pagduwa sulod sa 31 minutos ug mipaksit kinig 40 puntos.

Ang iyang pull-up jumper gikan sa walang bahin sa kata­pusang 1:41 sa second quarter maoy naka­pahitapo kaniya sa mga 20,000 ­pointer sa NBA.

Sa dihang gi­­­a­­nunsyo ang iyang nakab-ot, si Du­­­rant nakadawat og standing ovation nga mapahiyumon nga nagli­ngo-lingo.

Sa laing duwa, mipahilum sa Minnesota Timberwolves si Russel Westbrook ug ang Oklahoma City Thunder, 104-88.

Si Jimmy Butler mipuga og 26 puntos, milangkat og pito ka rebounds ug adunay walo ka assists alang sa T-Wolves kinsa nakabenipisyo usab sa 19 puntos ni Andrew Wiggins.

Maayo untang nakaduwa si Westbrook kinsa mipabuto og 38 puntos ug 10 ka rebounds, apan ang laing sinaligan nga sila si Paul George, Carmelo Anthony ug ang ubang mga shooter sa Thunder wa makapakita og ayo.

Si Anthony aduna lay 15, samtang 13 ang naamot ni George ug dos lang nahipos sa first half.

Gisurprisahan usab sa Dallas Mavericks ang Hornets, 115-111, ug gipagtong sa Miami Heat ang Indiana Pacers, 114-106. Gipakuratsa sa Utah Jazz ang Washington Wizards, 107-104, samtang gikuniskunis sa Detroit Pistons ang Brooklyn Nets, 114-80.

Gisungay sa Chicago Bulls ang New York Knicks, 122-119, ug gibungkag sa Houston Rockets ang Portland TrailBlazers, 121-112.

Wa usab magpabitin ang Memphis ug ilang nahangkab ang New Orleans Pelicans, 105-102. Wa magsilbi ang Magic sa Orlando kay gibaraw man kini sa Milwaukee Bucks, 110-103, ug gidagit sa Atlanta Hawks ang Denver Nuggets, 110-97. (JBM)


VIEW COMMENTS