SECTIONS
Sunday , June 24, 2018

Binghay: Naukay sa ‘Classic bai’

KUNG mahilig ka mag Face­book, seguro naka­bagat ka na ining ma­kalingaw nga Classic Bai to the Titos and Titas of Cebu.

Matod ni JP Chiongbian, ang nag-unang tigdumala ini, nagka anam na og ka dako kining komunidad. Gani, mi–abot na og 80,000 ang miyembro ini sulod lang sa duha ka bulan sukad pagsugod og 5,000 na ka post ang napatik nga dunay nagkatay ang nga dul-an 500 mil ka mga komentaryo sa mga Cebuanos sa tibuok kalibutan.

Mas naglabi ang maka-relate nga mga SK (Subra sa Kwarenta) pataas nga nagdako sa dekada 70, 80 ug 90. Ang nakanindot kay gawas nga makalingaw, balos-balos sab ang mga komentaryo, huna-huna ug kasinatian.

Atong balikan ang mga maanindot nga mga posts sa nanglabay’ng kagahapon.

Kahinumdom ka pa sa ‘Sayaw sa Awa-aw’ sa probinsiya, disco sa dagkong dakbayan ug kinural nga sayaw kon discoral sa mga eskinita, mga duwa nga makalingaw kaniadto sama sa syatong, takyan, bato-lata, tubig-tubig, dakop-dakop, tago-tago apil ang yoyo, roller skates, pa-away sa kaka ug tirador nga kanunay’ng naka tak-in sa purol.

Sa wa pa ma uso ang mga malls, sikat kining mga tindahana sa may downtown Colon: Gaw, Rositas, ug Day and Night, apil ang original nga Whitegold, Atin Supermart, ug mga lamiang kan-anan sama sa Pete’s Kitchenette, Pocherohan sa may Capitol ug Abuhan sa may Kan-Irag, Ramos ug ngoyongan daplin sa may San Jose.

Di sab ko kalimot ining mga linyaha sa Puropaganda: 555 Sardines- ‘kay nakalugsong man’, CSB nga bangko- ‘pa gamay-gamay lang’, Family Rubbing Alcohol nga ‘di lang pang pamilya, pang esports pa!’

Cebu Autobus sab ang suki namong sakyan mga taga probinsiya samtang kusog ang suroy-baligya sa sigarilyo nga Pall Mall, po­mada nga Three Flowers ug pahumot nga Kamino Moto.

Sa wa pa ang DVD players, uso kaniadto ang Betamax ug Betacord.

Kini ug daghan pa ang ma­kalingaw nga mga posts sa Classic Bai.

Hinaot nga mapadayon ang panagsukliay sa makamingaw nga kagahapon. Pit Senyor sa tanang nagsunod!


VIEW COMMENTS