SECTIONS
Saturday , June 23, 2018

Editoryal: Ang pagbalik sa Tokhang

HUMAN gibalik ni Presidente Rodrigo Duterte ang Philippine National Police (PNP) sa kampanya batok sa gidiling drugas, si PNP Chief Director General Ronald dela Rosa sa niaging adlaw mimando sa mga hepe sa kapulisan nga ibalik ang ilang anti-drug operation nga mao ang “Oplan Tokhang” sugod karong buwana.

Gipaniguro ni dela Rosa nga ning higayona ang tinud-anay nga katuyo-an sa Oplan Tokhang mao na gyuy ipasunod diin mao ang pagtuktok ug paghangyo sa mga drug suspects sa pag-surrender ug dili ang pagpatay.

Sa niagi man gung tuig, ang Operation Tokhang gisakyan sa mga abusadong pulis ilabi na kadtong mga tinugyanan sa balaod nga niduwa o nakig-abin usab sa pagpayuhot sa gidiling drugas.

Mao nga dunay daghang mga anti-drug operations nga nakontrobersiya sanglit yano ra nga pamatyon ang mga drug suspects bisan pa man og way ikasukol. Kini posibling tinuyong gihimo sa tinguha nga dili makapiya-it.

Gumikan sa sunodsunod nga kontrobersiya, napugos si Presidente Duterte sa pagsuspenso sa kinatibuk-ang puwersa sa PNP sa kampanya batok sa gidiling drugas ug gitugyan na ang tanan ubos sa Philippine Drug Enforcement Agency (PDEA).

Apan sa pagkawagtang sa PNP, daw mikusog og balik ang pagkatap sa mga illegal drugs tungod sa kakuwang og mga tawo sa PDEA, hinungdan nga gibalik ni Duterte ang kapulisan.

Buot ba ipasabot nga mobalik na usab ang madugoon nga anti-drug operations sa kapulisan?

Dunay dakong posibilidad kay ang 2018 budget, wa maglakip og gahin nga alang unta sa pagpamalit og body camera nga gamiton sa police operations aron maoy magmatuod nga pinasubay sa balaod ang ilang operations.

Sa ato pa, sama gihapon kaniadto, nga ang raiding team ray nasayod sa tinud-anay nga nahitabo atol sa operations, gawas lang kon dunay CCTV camera ang dapit.


VIEW COMMENTS