SECTIONS
Monday , June 25, 2018

USJ-R kaging sa UC

NAKAMUGNA og kompli­kas­yon ang University of Cebu (UC)/M.Lhuillier Webmasters human nila gipakaging ang University of San Jose Recoletos (USJ-R)/May Abuhan, 71-57, sa premirong du­wa kagahapon sa 2018 Cebu City Sinulog Cup Invitational basketball tournament sa Cebu Coliseum.

Ning maong kadaugan sa Webmasters ni coach Raul “Yayoy” Alcoseba nakahatag og seguradong luna sa Cebu Landmasters/Bogo City sa finals bisan unsa pa’y resulta sa duwa niini batok sa Manila squad Marinerong Pilipino sa main game.

Ning pagsuwat, padayon pang nagsangka ang Landmasters ug Marinerong Pilipino, nga usa ka miyembrong team sa Philippine Basketball Association (PBA) D-League.

Ning pagsuwat, ang Landmastes adunay 3-0 nga record samtang ang Marinerong Pilipino naggunit og 2-1 nga baraha.

Ang Webmasters ug Jaguars parehong naggunit og 2-2 nga rekord ug ang ilang poruhan sa inilugay sa ikaduha ug nahabiling luna sa finals nagdepende sa resulta sa Landmasters ug Marinerong Pilipino, nga maoy katapusang duwa sa elimination round.

Kon mingdaog ang Landmasters kagabii, hayan ma­porma ang triple-tie sa 2-2 nga rekord diin mahilambigit ang Marinerong Pilipino, Webmas­ters ug Jaguars.

Ning sitwasyuna, gamiton ang quotient system ug ang mopatigbabaw mao ang makaangkon sa nahabiling puwesto sa finals samtang ang mahabilin mao ang mag-ilog sa ikatulong dapit.

Nasayod nga nagkinahanglan silang modaog og dakong labaw, ang Webmasters ningbanat gihapon og insakto sa krusyal nga bahin bisan hayaghayag na ang ilang kadaugan.

GIkan sa 64-57 lang nga labaw sa hinapos nga bahin, ang Webmasters ningratsada gihapon aron mugnaon ang 7-0 run nga gibuwakan sa three-point shot ni Joren Tagudin aron pagtali sa 14 puntos nga kadaugan.

Ang kadaugan sa Webmasters gipangulohan sa ilang import nga si Frederick Elombi, kinsa nagpakatap og 18 puntos, nidugang og 15 puntos si Ruben Ludovice samtang niamot og 13 puntos si Tagudin.

Ang Jaguars ni coach Edito Salacut gipangulohan ni Miguel Gastador pinaagi sa iyang 17 puntos samtang nitampo og 13 puntos si Fletcher Galvez.

Ang inilugay sa ikatulong dapit ipahigayon karong alas 4:00 sa hapon unya mosunod ang finals.

Adunay ipahigayon nga exhibition game sa alas 2:00 sa hapon tali sa mga basket­bolista nga maggamit og wheelchair. (ESL)


VIEW COMMENTS