SECTIONS
Saturday , June 23, 2018

3 ka dagkong proyekto sa Talisay gisubhan

TULO ka mga dagkong pro­yekto sa siyudad, motorsiklo ug sakyanan alang sa kapulisan gi-turn-over ni Mayor Eduardo Gullas atol sa ika-17 ka tuig nga pagsaulog sa Charter Day kagahapon.

Ang maong kalihukan gi­sugdan sa usa ka santos nga misa human niini midiretso ang mayor sa pagsubo sa modernong merkado sa sa Tabunok nga mnigasto og dul-an og P200 milyones.

Si Gullas miingon nga ang maong merkado hingpit na unyang mabalhinan sa mga manindahay labing dugay karong sunod buwan.

Gipasalig sa mayor nga patas ang tanang manindahay nga makaangkon sa ilang puwesto sanglit ipa-agi sa raffle aron mawagtang ang pagduda nga adunay pagpabor-pabor.

Human sa merkado midiretso usab si Gullas sa merkado sa Barangay Lagtang nga karon gihimo nang Technical Vocational School inabagan sa TESDA.

Ang maong proyekto migasto og usa ka milyon ka pesos aron himuon nang classroom ang merkado alang sa mga kurso nga dali rang mahuman agig tabang niadtong mga out of school youth nga gusto makakitag trabaho human sa ilang pagtungha.

Human niini gisubhan usab ang usa ka pasilidad nga gitawag og Talisay City Women and Children Development Center nga migasto og dul-an 5 milyones ka pesos nga gitunga sa kagamhanan sa Talisay ug sa Department of Social Welfare and Secrvices.

Si Felipa Solana ang pangulo sa City Social Welfare and Services miingon nga ang maong pasilidad mosulod og 10 ka tawo alang niadtong mga bata ug mga kababay-an nga nabiktima sa pagpangabuso.

Lakip na niini kadtong mga libod-suroy nga mga bata sa dakbayan sa Talisay nga ilang ma-rescue diha sa kadalanan.

Gawas sa tulo ka mga dagkong proyekto, pormal nga gi-turn-over ngadto sa kapulisan ang upat ka mga motorsiklo ug usa ka patrol car.

Ang maong patrol car usa pa lang sa tulo nga gisaad ni Mayor Gullad ngadto sa kapulisan. (DRT)


VIEW COMMENTS