SECTIONS
Sunday , June 24, 2018

100 container vans para Devotee City

SI Roberto Cabarrubias, he­pe sa Cebu City Department of Public Services (DPS), nagkanayon nga moabot na karong alas 8:00 sa gabii ang 100 ka container vans dapit sa Compania Maritima alang sa ‘Devotee City’ para sa mga deboto gikan sa nagkalainlaing pro­binsiya nga motambong sa Sinulog 2018.

Si Cabarrubias niingon nga magsugod na karong Enero 19, Biyernes ang pag-accomodate sa mga deboto atol sa selebrasyon.

Miangkon sab si Cabarrubias nga wala gyud sila’y dakong lugar nga pwede mahimutangan sa mga container van kung diin maoy gamiton aron katulgan sa mga deboto sa Sinulog 2018.

Sumala niya nga dili angay butangan og mga container van ang kadalanan nga nahimutang duol sa Compania Maritima ma­hitungod kay gilibre kini para lamang sa mga motorista.

Posible sab nga magdala og ka­huot ang kagamay sa maong lugar maong aduna na sab sila’y mga giandam nga mga tents nga pwedeng magamit sa uban.

Mibutyag sab siya nga dunay kapasidad nga ma­kapasulod og 20 ka tawo ang usa ka container van lamang.

Giseguro sab ni Cabarrubias nga aduna sila’y mga medical services aron sa pag-alerto sa mga posibleng emergency.

Base pa sab sa estastika nga gipahigayon sa Department of Public Services, niubos sa 2800 ka mga tawo ang motambong karon sa Sinulog 2018 gikan sa 3000 ka tawo nga nitambong miaging tuig.

May posibilidad sab nga ang kadaot nga gidala sa mga nilabay nga mga bagyo ang rason nganung niubos ang numero sa mga gidahom nga moapil sa Sinulog 2018.

Apan nanghinaot gihapon si Cabarrubias nga modaghan pa ang mga debotong mosalmot alang sa selebrasyon.

Mapasalamaton sab si Ca­barrubias mahitungod kay gipahuwam sila sa 2-GO og 100 ka mga container van. Miaging tuig adunay 120 ka mga container van, dugang niya.

Limpyohan sab ang mga gii­ngong van pinaagi sa tabang sa kabomberohan. (Michelle Anne Obor, USJR Intern)


VIEW COMMENTS