SECTIONS
Monday , June 25, 2018

Katunga sa Osmeña Blvd. sirhan sa Sinulog sa Lalawigan

PIPILA ka mga dalan ang sirhan pag-usab karon ug ugmang adlawa alang sa Sinulog sa Kabataan sa Lalawigan ug sa Sinulog sa Barangay.

Kagahapon pormal na nga gibuksan ang aspeto sa kultura sa Sinulog 2018, pinaagi sa opening salvo parade.

Nipahimangno usab ang Cebu City Transportation Office sa mga dalan nga sirhan karong hapon alang sa Sinulog sa Kabataan sa Lalawigan.

Lakip sa sirhan ang usa ka lane sa Osmeña Blvd., gikan sa Capitol Site paingon sa Cebu City Sports Center, sugod alas 12:00 sa udto hangtod mahuman ang maong aktibidad.

Pito ra hinuon ka contingents ang magtigi karong, adlawa lakip niini ang City of Naga Division, City of Bogo Science and Arts Academy, Tribu Ginatilan, Municipality of Tuburan, Talisay City Central Elementary School, Carcar City Division ug Tribu Hinatdan sa Palanas, Ginatilan.

Ang Tuburan National High School andam nang panalipdan ang ilang titulo isip mananaog sa Sinulog sa Kaba­taan sa Lalawigan secondary division sa miaging tuig.

Kagamhanan sa lungsod sa Tuburan masaligon nga magmalampuson gihapon sa indigay ang ilang representante sa tinuig nga kalihukan.

Matod ni Tuburan Mayor Democrito “Aljun” Diamante, nahimo nang panaad sa ilang lungsod, ubos usab sa iyang pagdumala, ang pagpadala og contingent sa Sinulog matag tuig agi og pasalamat ngadto kang Sr. Sto. Niño.

Ugmang adlawa usab ang Sinulog sa Barangay diin 20 ka mga contingent ang magtigi. Sirhan sa CCTO ang mga dalan nga apektdao lakip ang Osmeña Blvd., gikan sa Legaspi Extn. (Plaza Independencia), dayon subayon ang Legaspi St., pawala sa Plaridel Extn., liko dayon patuo sa Osmeña Blvd., pasulod sa Cebu City Sports Complex.

Sugdan kini ug sirhan alas 10:00 sa buntag.

Lakip sa mga contingent nga apil mao ang Tribu Buwad Festival sa San Nicolas Proper, Tribu Timbal Mambalinganon, Tribu Cogonanon sa Cogon Pardo, Tribu Buhisan, Barangay Bulacao, Mabag-ohang Kabatan-onan sa Duljo Fatima, Hugpong Karasikas, Pundo sa Maampuong Tisaanon, BMO - Sawang Calero. Tribu Bacayanon, Tribu San Roquehanun, Tribu Mabolokon, Tribu Mahugyawong Pasil, Tisa Performing Arts, Barangay Lahug Dance Company, Apas Central Command - BMO, Lu­mad Basakanon, Hugpong Kabatan-unang Mananayaw sa Sapangdaku, Banay Labangon ug Banauan Cultural Group.

Aduna’y ipakatap nga mga traffic personnel ingon man mga traffic signs alang sa mga jeep nga i-reroute samtang gipahigayon ang kalihukan. (dugang taho ni AZDL)


VIEW COMMENTS