SECTIONS
Wednesday , April 25, 2018

Pintor gipatay atubangan sa iyang pamilya

PINTOR sa sakyanan gipusil patay samtang naangin ang iyang kapuyo atubangan sa ilang tulo ka mga anak sa sitio Tuburan, Barangay Punta Princessa, siyudad sa Sugbo kagahapon sa buntag.

Ang biktima giila nga si Edgardo Flores, 42, kinsa nakaangkon og usa ka pinusilan sa ulo hinungdan sa kamatayon samtang naangol usab ang iyang kapuyo nga si Mylene Abadili, 30.

Matod sa uyoan ni Flores nga si Macario Tura nga duha ka buto ang iyang nadungog.

Pipila ka mga sigundo ang milabay, iyang nakita ang duha ka mga lalake nga naglumba ug pahilayo sa dapit diin gipusil ang iyang pag umangkon.

“Naghigda ko diri sa sulod sa balay. Nakadungog nalang ko duha ka buto. Paglili nako, nidali paglakaw ang duha ka tawo. Likod na lang akong makita. Nag sul-ob og itom nga sinina,” matod ni Tura.

Padung na unta maniudto sila si Flores ug Abadili uban sa iyang tulo ka anak dihang ning-abot ang duha ka mga lalake ug dayong pusil.

Apan si Abadili nga nakabantay nigakos kang Flores maoy nakaingon nga naigo usab sa iyang bitiis.

Si PO3 Winston Magdadaro, imbestigador sa Homicide section, nagkanayon nga blangko pa sila sa motibo sa krimen sanglit wa pa nila mahinabi si Abadili nga naa pa sa tambalanan nagpaalim sa iyang samad. (AYB)


VIEW COMMENTS