SECTIONS
Monday , June 18, 2018

Mongaya: Naa na kay app sa Sinulog 2018?

DI pa diay ko tantong gurs. Pipila sa akong gi-private message nga mas manghod nako kay nangutana unsaon pag-download ug install sa labing bag-ong uso sa Sinulog nga mao ang mobile app nga “Sinulog 2018.”

Simple lang kaayo. i-search ang “Sinulog 2018” diha sa Google Play Store kon Android imong cellphone o App Store kon i-phone.

Ayaw paulahi. Magamit kini aron pagsiguro sa mga schedule sa events sa Sinulog lakip na ang sa mga kalihokan sa Cebu City Sports Center, sa Basilica del Santo de Cebu, ug sa Kalingawan sa Plaza.

Apil sab ang mga kalihokan ug produkto sa mga app sponsor nga mao ang Bloq Residences, Palm Grass Heritage Hotel, ug City Time Square.

Labing makalingaw mao ang pagbotar sa “Festival Queen App Users’ Choice.” Ang imong paborito makadaog niining maong special award.

Ang naka-install sa mobile app mao ray makabotar alang niining special award.

Gitakda nga magsugod ang pagbotar ugmang adlawa. Makita kini sa countdown.

Sakripisyo

Ubay-ubay sa atong mga kaigsuonan ang nakalitan sa bag-ong sistema sa pagsulod ug gawas sa Basilica del Santo Niño. Ang entrance man gud tua na sa gate dapit sa Magellan’s Cross ug ang exit diri na sa gate dapit sa Osmeña Blvd.

Mas maayo kuno ang pareho sa una nga sulod ug gawas ang mga tawo sa duha ka gate. Nakalimot na ba kita sa mga reklamo sa miaging katuigan?

Karon, moreklamo na sab kay layo ang lakawan aron makatambong og Misa ug Novena sulod sa Basilica.

Maglibog lang ko nga mo­reklamo sa taas nga ruta apan momatag kaadlawon alang sa Walk for Mary ug moapil sa mas taas nga ruta sa prosesyon.

Milagro

Mobiya una kita sa Sinulog ug mobalising kita sa giingong mga milagro diha sa Court of Appeals.

Lalim bay sa desisyon sa special division sa Court of Appeals (CA) niboto 3-2 nga i-dismiss ang murder case batok kang kanhi Palawan Gov. Joel T. Reyes.

Dayon gimando-an ang Puerto Princesa City Regional Trial Court (RTC) nga hunongon ang tanang aksyon batok kaniya. Sa maong desisyon, niingon ang mga hurado nga usa kini ka “milagro.”

Sa laing bahin, milagro usab alang kanako ang mga desisyon sa Court of Appeals dinhi sa atua sa Sugbo kay nagsigi sab kinig pabor sa na-dismiss na nga si kanhi gobernador Roel Degamo sa Negros Oriental.

Gani, duna kitay nadawat nga impormasyon nga nakaluwat na sab og laing mando ang CA pabor kang Degamo apan basi sa pag-review og kaso nga giingong non-existent. (@anol_cebu sa Twitter)


VIEW COMMENTS