SECTIONS
Sunday , June 24, 2018

UC/M.Lhuillier 3rd sa Sinulog Cup ‘18

GIANGKON sa University of Cebu (UC)/M.Lhuillier Webmasters ang ikatulong dapit human nila giusban pagpukan ang University of San Jose Recoletos (USJR)/May Abuhan Jaguars,84-72, kagahapon sa 2018 Cebu City Sinulog Cup Invitatio­nal basketball tournament sa Cebu Coliseum.

Ang Webmasters ni coach Raul “Yayoy” Alcoseba naka­bulsa og P30,000 nga ganti samtang ang Jaguars nakaluklok og P10,000.

Ang Webmasters, nga ningbuntog sa Jaguars, 71-57, sa ka­tapusang adlaw sa elimination round, nagkagidlay pa sa sa­yong bahin ug naggukod kini human sa 1st quarter, 16-20.

Padayon nga nagkontrolar sa duwa ang Jaguars ni coach Edito Salacut sa 2nd quarter ug nag­labaw kini’g 35-30 sa halftime.

Sa pagpangulo sa ilang import nga si Frederick Elombi ug pointguard Justine Dacalos, ang Webmasters ningpasutoy sa ilang opensa sa 3rd quarter diin gilupig nila sa hinakutay og puntos ang 25-17 aron pagposte og 55-52 nga labaw pagsulod sa 4th quarter.

Ning higayuna, tatawng nailog na sa Webmasters ang momentum sa duwa hangtod nga nakaposte sila og 78-63 nga labaw pinaagi sa three-point shot ni John Calvin Jabello sa nahabiling 3:16 minutos.

Wala na nakabangon pagbalik ang Jaguars gikan niini hangtod na sa katapusang gutlo.

Gipangulohan ni Elombi ang kadaugan pinaagi sa iyang 29 puntos, nidugang og 17 puntos si Dacalos samtang niamot og 13 puntos si Ruben Ludovice.

Ang Jaguars gipangulohan ni Jaybie Mantilla pinaagi sa iyang 16 puntos, niamot og 15 puntos si RJ Dinolan samtang nihatag og 13 puntos si John Ubalde.

Ning pagsuwat, padayon pang nagsangka ang Cebu Land­mas­­ters/Bogo City ug PBA D-League squad Marinerong Pilipino sa knockout finals. (ESL)


VIEW COMMENTS