SECTIONS
Monday , June 18, 2018

Cavs pildi na sab

NINGBANGON gikan sa 22 puntos nga pagkalubong ang host Indiana Pacers aron pakuratan ang Cleveland Cavaliers, 97-95, kagahapon sa NBA.

Kini maoy ikatulong su­nodsunod nga kapildihan sa Cavaliers ug ikatulo sab kini nilang pilde batok sa Pacers ning maong season.

Si Pacers coach Nate McMillan nakadesisyon nga mogamit og gamay nga lineup dihang nalubong sila sa Cavaliers ug maayo ang resulta niini.

Ang nakapakita og labing maayong duwa dihang ninggukod ang Pacers mao si Lance Stephenson, kinsa nitampo og 16 puntos alang sa kadaugan.

“It feels good, but it’s a long season,” matod ni Stephenson. "They’re a tough team, but we came out and played smart defense and made the right plays.”

Ang Cavaliers, nga gikan sa duha ka sunodsunod nga dagkong kapildihan, ming­aksyon paglubong sa Pa­­cers sa sayong bahin ug na­kamugna dayon kini’g 22 puntos nga labaw sa 1st quarter pa lang.

Apan human niini, hinayhinay apan padayon nga nagkamang ang Pacers hangtod nga ilang naangkon ang makutas nga kadaugan.

Gipangulohan ni Darren Collison ang kadaugan pinaagi sa iyang 22 puntos samtang nidugang og 19 puntos si Victor Olapido apan ang nahimo ni Stephenson hilabi na ang depensa niini ngadto kang James ang nakaagak sa Pacers sa krusyal nga bahin.

Si James napungot kang Stephenson, kinsa iyang gihulagway nga hugaw moduwa.

“Lance is just a little dirty, that’s all. He’s a little dirty,” matod ni James, kinsa nata­wagan og technical foul makausa batok kang Stephenson.

Ang Cavaliers gipangulohan ni James pinaagi sa iyang 27 puntos ug 11 rebounds, nidugang og 21 puntos si Kevin Love samtang niamot og 13 puntos si Jeff Green.

Ang Cavaliers ningkombati nga wala ang duha sa ilang mga sinaligan nga sila si Dwyane Wade ug Isaiah Thomas, kinsa parehong gipapahuway sa coaching staff.

Sa laing mga duwa, ningdaog ang Charlotte Hornets batok Utah Jazz, 99-88, Washington Wizards batok Orlando Magic, 125-119, Brooklyn Nets batok Atlanta Hawks, 110-105, Golden State Warriors batok Milwaukee Bucks, 108-94, Minnesota Timberwolves batok New Yokr Knicks, 118-108,

New Orleans Pelicans batok Portland TrailBlazers, 119-113, Denver Nuggets batok Memphis Grizzlies, 87-78, ug Houston Rockets batok Phoenix Suns, 112-95. (AP, ESL)


VIEW COMMENTS