SECTIONS
Monday , May 28, 2018

Flying connection hinungdan sa sunog

GILAMOY sa kalayo ang duha ka andanang panamilay Sabado sayo sa buntag sa Zone-5, Barangay Kauswagan, dakbayan sa Cagayan de Oro.

Gipanag-iyahan sa usa ka Ramil Bacug ang balay nga naugdaw human lamya sa kalayo diin gibana-banang mokabat sa P8 mil ang structural nga damyos gumikan kay ginama lang kini sa mga light materials.

Sa nahipos nga impormasiyon gikan sa City Fire District ilabi na ni Senior Fire Officer 1 Dennis Dalis, gikabutyag nga migawas sa inisyal nga imbestigasiyon nga tungod matud pa sa flying connection ang hinungdan sa kalit nga pag-ulbo sa kalayo apan gisuta pa ang taho nga kung kini ba usab ang pagka over-charge sa cellular phone ang maoy tinubdan sa sunog.

Gikabutyag nga namat-an na lamang sa mga biktima nga nagkalayo na ang ilang lawak human nga gipukaw kini sa iyang mga anak kinsa nakamata usab tungod sa kainit sa pagdilaab sa dakong kalayo diin nagsugod kini diha sa ika-duhang andana sa balay.

Nagsugod ang kalayo mga alas 4:28 sa kaadlawon diin nakontrolar ang kalayo mga alas 4:35 ug gideklarang fire-out mga alas 4:38 sa buntag kagahapon. Swerte usab nga wala’y natalang naangol atol sa sunog.

Padayon nga nagpahimangno ang tinugyanan sa Bureau of Fire and Protection nga magbinantayon aron malikayan ang susama niini nga panghitabo.


VIEW COMMENTS