NABUNTURAN, Compostela Valley -- Upat ka mga tawo ang kompirmadong namatay human mataboni og yuta samtang laing 63 ka pamilya ang gipabakwit tungod sa baha hatud sa pag-ulan sa probinsiya.
Mga namatay giila nga mao si Raymond G. Magallanes, 20, Rowena T. Sajulan, 23, Hazzel S. Magallanes, 4, Joey S. Magallanes, 2, pulos nagpuyo sa Barangay Tandik, Maragusan, sa nahisgutang probinsiya.
Sa interbyu sa SuperBalita, gibutyag ni Raul P. Villocino, Special Operation Officer IV sa Provincial Disaster Risk Reduction and Management Office, nga alas 8:30 sa gabii niadtong Dominggo, dihang midahili ang yuta ug natabunan ang balay sa mga biktima. Ngitngit ang kagabhion ug kusog ang bunok sa ulan busa walay nakalingkawas sa landslide.
Gidason ni Villocino pinaagi sa kapitan ug mga opesyales sa barangay nga narekober ang mga patay'ng lawas sa mga biktima alas 10:30 na sa gabii.
Samtang niadto pang Dominggo sa gabii, gideklara na sa mga mayores ang mga klase sa mga lungsod sa Nabunturan, Mawab, Mabini, Montevista, Compostela, New Bataan ug Monkayo.
Samtang nagpatuman sab og pre-emptive evacuation si Nabunturan Mayor Chelita Amatong diin 27 ka pamilya o 116 ka indibiduwal gikan sa Purok 1 ug Purok 7, Barangay Basak, Nabunturan ang temporarayong mipuyo sa San Juan Elementary School ug sa Barangay Gym.
Mikabat sab sa 36 ka pamilya o 133 ka indibiduwal ang mibakwit gikan sa Purok 8, Barangay Magsaysay ngadto sa Magsaysay Elementary School.
Siyam ka pamilya o 20 ka indibiduwal ang mibakwit gikan sa Purok 8, Barangay Magading ngadto sa Magading Evacuation Center.
Nanawagan si Villocino sa publiko nga sundon ang mando sa mga kapitan atol sa pre-emptive evacuation aron malikay sa peligro.
Dugang niya, pipila ka mga dapit sa probinsiya ang paspas nga misaka ang lebel sa tubig sanglit wala pa kini mahubas tungod sa mga bagyo nga Vinta ug Agaton.
Sa pagsuwat ning balita, padayon pa ang rescue operation sa mga lokal nga kagamhanan sa mga apektadong lugar.