SECTIONS
Wednesday , June 20, 2018

Mga party drug nangasakmit

UNOM ka mga tawo nasikop sa gihimong anti-drug operation sa mga sakop sa Regional Special Operations 7 sud sa usa building sa E. Benedicto St., Barangay Za­patera, siyudad sa Sugbo.

Ang mga nasikop pinaagi sa buy-bust operation giila nga silang Claude Bernard Deen Peña, 21, taga Sepulveda street Cebu City; Diane Rose Cabiling Revellas, 20, taga Binlod Argao ug tinun-an sa usa ka unibersidad sa syudad sa Sugbo; Ann Marielle Villahermosa, 26, taga Sangi Calajoan Minglanilla; Justin Carl Santillan, 21, taga Basak Bontores, taga Cebu City, tinun-an sa kolehiyo; Kevin Acenas Caballero, 25, taga S. Osmeña, Gun-ob, Lapu-lapu City ug call center agent; ug Jaybee Alueta Ocat, 20, taga Poblacion 2, Malabuyoc ,Cebu.

Moabot ngadto sa 16 ka kapsula sa Barcelona Ecstasy ang nakuha sa ilang posisyon nga mobalor ang tanan sa P40,000.

Sa gihimong interogasyon sa RID-7 gitug-an sa usa sa mga nadakpan nga ang ilang source gikan sa usa ka ginganlag Pamela Racines, 22, taga Saint Jude Acres Bulacao sa syudad sa Sugbo diin didto siya nasikop sulod sa usa ka party sa syudad sa Mandaue niadtong Biyernes sa gabii.

Nakuha niya ang tulo ka kapsula ug tunga nga gituohan nga nahalinan na sa sulod sa party.

Matod ni Police Supt. Josefino Ligan, hepe sa Regional Intelligence Division 7, nga nakadawat sila og impormasyon nga naghitak ang pagpamaligya sa illegal nga drugas hinungdan nga sila naniid.

Gahapon sa kaadlawon laing kauban niini ang nasikop sulod sa usa ka condominium unit sa Mango Avenue sa syudad sa Sugbo nga si Ryan Didaton nga nakuhaan usab og Barcelona Ecstasy nga balor P70,000.

“Ryan is native from Iligan . He owned a unit in the condomonium and he is staying there. Information revealed that 3 years ago he was already here. We are still continuing the tactical briefing with Ryan” matod ni Ligan.

Nagtoo si Col. Ligan nga mao na kini ang negosyo ni Didaton ang pagpamaligya sa mga party drugs panahon sa sinulog ilabi na sa mga street party.

Tungod niini, pahugtan pa sa kapulisan ang mga kalihukan sa Sinulog ilabi na sa mga disco party nga dugokon sa mga batan-on sanglit naa sa maong mga kalihukan ipaka­tap ang mga party drug sa ilang paglingawlingaw. (AYB)


VIEW COMMENTS