SECTIONS
Tuesday , May 22, 2018

Sakristan patay sa operasyon

NAPAGAN sa pinusilay ang usa ka 16 anyos nga sakristan sa gipahigayon nga operasyon sa kapulisan sa Barangay Cogon, lungsod sa Balingasag, Misamis Oriental.

Naigo sa iyang tangkugo nga milahos sa dughan ang sakristan nga giilang si Francis Nikko Cabahalan kinsa giingong igo lang nagtan-aw og telebisyon niadtong tungora mga alas 4 sa hapon niadtong Martes, Enero 23.

Si Police Senior Superintendent Rolando Destura, kinsa Provincial Director sa Misamis Oriental Provincial Police Office, namahayag nga ang operasyon aron pagsilbi unta og warrant of arrest batok sa wanted nga mao si Baldomiro Pajo kinsa numero unong high-value target sa provincial level, notadong motorcycle-riding suspek ngadto sa giingong nakabatal kaniya sa ginadili nga druga.

Ang operasyon gilangkoban nila ni Police Chief Inspector Esperidion Biado, Balingasag Police Station ug Misamis Oriental Provincial Mobile Force Company.

Apan nakamatikod si Pajo sa presenya sa mga pulis hinungdan misukol kini pinaagi sa pagbalos og pagpamusil sa mga pulis.

Nagdagan pa kini og nisaka sa mga atop sa kabalayan sa dapit nipaingon sa basakan ug dihang nakakita og bata gidala-dala niini aron himuon og taming. Apan kay daw nakalangan kini sa iyang pagsibat, misulod kini sa usa ka balay usa nakigpinusilay sa kapulisan.

Apan wala kini nagmadaugon dihang naigo gayud kini sa kapulisan hinungdan sa kamatayon niini diha dayon.

Subo lamang nga dunay naangin sa pinusilay ug mao kini ang sakristan.

Matud ni Destura nga gihulat pa nila ang resulta kon kinsa nga pusil ang nakaigo sa sakristan labina kalibre .45 ang miigo niini.

Gipasalig niini nga kon gikan man ugali sa ilang sakop, mag atubang gayud ug kaso ang nakapusil niini.

Ang duha ka mga namatay gidala na sa punerarya sa maong lungsod karon panahona.

Tungod niini, nanawagan karon si Destura sa mga nalambigit sa ginadili nga druga nga undangon na kini aron dili masusama sa biktima.

Dugang sab niini nga ang tabang gayud sa katawhan usa sa dakong kasulbaran sa mga nalambigit niini kon makigkoordinar lamang kanila.


VIEW COMMENTS