MOABOT sa kapin usa ka milyon ka kilo sa mga basura ang na-generate sa tibuok probinsiya sa Sugbo matag adlaw sa 2017.
Kini base sa gihimo nga technical waste analysis sa Provincial Environment and Natural Resources Office.
Mga Sugbuanon giawhag nga mohimo gyud sa waste segregation.
Giila sa PENRO ang nagkadako nga problema sa basura sa tibuok probinsiya sa Sugbo.
Base sa gihimo nga technical waste analysis sa Solid Waste Management Division sa maong buhatan, nasuta nga matag adlaw sa 2017, anaa sa 1.2 million kilos sa basura ang na-generate. Sa tibuok tuig, moabot kini sa 438 milyunes ka kilos.
Matod sa solid waste management assistant sa PENRO, Rhica Evilla, sagad sa mga basura nga nahipos mao ang mga biodegradable waste o malata nga mga basura apan duna sab silay natala nga mga plastic.
Subay sa nagkataas nga waste generation sa tibuok probinsiya, giawhag ni PENRO officer-in-charge Jayson Lozano ang mga Sugbuanon nga motuman gyud unta sa dugay rang gikampaniya nga waste segregation.
Kini mao ang paglainlain sa mga basura, ilabi na sa mga malata ug di malata, lakip na niadtong mga mapuslan pa o mahimong i-recycle.
Giangkon sa PENRO nga wala pay natukod nga kaugalingong landfill ang probinsiya sa Sugbo gawas lang sa mga dump site, nga gidumala sa mga pribadong kompaniya.
Ang PENRO nakapatukod na hinuon ug material recovery facility sa tanang 51 ka mga LGU sa probinsiya alang sa recycling sa mga basura nga mahimo pang mapuslan.