MOABOT sa 26 ka mga gagmay’ng pakete sa gituohang shabu ug uban pang kontrabando ang nasakmit atol sa gilusad nga greyhound operation sa Cebu Provincial Detention and Rehabilitation Center (CPDRC).
Atol sa ikaduhang adlaw sa subling pagbalik ni CPDRC acting warden Bobby Legaspi sa pwesto, nilusad dayon kini og greyhound operation kauban ang mga tinugyanan sa Philippine Drug Enforcement Agency (PDEA), Provincial Public Safety Company (PSC) ug Special Weapons and Tactics (Swat).
Gisubay sa mga awtoridad ang tanang 119 ka mga selda sa prisuhan, lakip na ang mga isolation cell u gang mga conjugal room.
Nakakuha sila ug 26 ka gagmayng pakete sa gituohang shabu gikan sa cell number 21, 76, 118 ug 119, diin duna’y mga piniriso nga nalambigit sa ilegal nga drugas.
Gani sa selda sa giila kaniadto nga number one drug suspect sa Sugbo nga si alyas Barok, pipila ka mga sachet sa drugas ang ilang nakuha.
Gawas niini, nakakuha sab sila ug kapin sa 100 ka mga lighter ug uban pang gamit sa pagsuyop ug pag-repack og drugas, TV monitor, cellular phones, kwarta ug uban pa.
Gisakmit usab ang mga sigarilyo gikan sa kooperatiba sa mga piniriso human nihatag ug go-signal ang gobernador nga hingpit nang i-ban ang pagpanigarilyo sulod sa bilangguan.
Gawas sa mga selda, gi-search usab ang administrative office sa prisohan apan wala hinuoy nakit-an nga kontrabando dinhi.
Nakuha ug gipaablihan usab ang vault, diin gibutang ang kwarta nga halin sa kooperatiba sa mga piniriso nga moabot sa kapin P250 mil.
Gusto’ng masiguro ni Legaspi nga wala gamita ug dili gikan sa ilegal ang maong pondo ug wala sab gihimo nga tagoanan sa kontrabando ang vault.
Matod ni Legaspi, angayang dili ibutang sulod sa prisohan ang vault sanglit maka-access man niini ang mga piniriso ug posibleng magamit nila kini pagsuhol sa mga personnel kon dunay ipalusot nga kontrabando.
Ang mga cellphone nga nasakmit sa operasyon, gikuhaan og SIM pack sa mga sakop sa CPDEA.
Matod ni PDEA Agent Earl Rallos, duna silay kahimanan nga makahimo ug SIM forensic examination ug posibleng makakuha silag mga impormasyon gikan sa mga SIM, ilabi na kadtong gigamit sa ilegal nga kalihukan.
Hangtud karon, gipatabang gihapon sa pagbantay sa prisohan ang mga tinugyanan sa PPSC ug gipasalig niini nga mas magmaigmat sa pagpatuman sa seguridad sa CPDRC aron dili na gyud unta malutsa pa ug kontrabando ang pasilidad.