MONKAYO, Compostela Valley -- Duha ka mga tawo ang namatay samtang usa ang samaron human gipusil sa nag-inusarang mamumuno.
Ang insidente nahitabo didto sa Purok 2, Barangay Casoon, alas 4:00 sa kaadlawon, Huwebes.
Mga biktima giila nga mao si Arnel Lopez, 27; Aljun Lopez, 23; Ariel Lopez, 19; ug Rolando B. Indab; parehong nagpuyo sa Purok 2, Barangay Casoon, Monkayo.
Base sa taho sa awtoridad, midangop sa Monkayo Municipal Police Station si Anastacio Esguerra, kapitan sa Barangay Casoon. Gitaho sa kapitan ang gidangatan sa mga biktima.
Si Police Officer 3 Jonel B. Campomanes sa Monkayo MPS naglusad gilayon og imbestigasyon sa insidente.
Migawas sa imbestigasyon nga usa ka wala mailhing lalaki ang miabot ug gisipa ang pultahan sa balay sa mga biktima nga nangatulog.
Dihang nakasulod ang suspek, gipusil niini ang mga biktima kinsa hinanok nga natulog sulod sa ilang lawak.
Nahiagom og samad pinusilan sa ulo si Arnel ug Aljun nga misangpot sa ilang hinanaling kamatayon.
Nakahiagom sab og samad pinusilan sa tiyan si Indab kinsa gidala ngadto sa Davao Regional Medical Center sa Barangay Apokon, Tagum City, Davao del Norte aron patambalan.
Gidason sa taho sa kapulisan nga luwas ug walay tatsa si Ariel human nahutdan og bala ang suspek kinsa paspas nga miiktad paingon sa ngilit nga bahin sa lugar.
Narekober gikan sa dapit sa nahitaboan ang usa ka balinis sa wala pa matinong kalibre sa pusil. Samtang kapulisan naglusad og halawom nga imbestigasyon aron mailhan ang suspek ug matumbok ang motibo sa brutal nga krimen.