SECTIONS
Thursday , May 24, 2018

Todino: Proyekto para sa barangay, munisipyo

GIPAGAWAS karon sa Department of Interior and Local Government ang siyam ka mga proyekto nga kinahanglan himuong priyoridad sa mga munisipyo sa Northern Mindanao.

Kini mao ang paghimo o palambo og dalan aron madugtong kadtong mga dapit nga walay saktong agianan, pagtukod og taytayan sa kabarangayan o munisiplyo, linya alang sa ilimnon nga tubig, mga pansayan, pundohanan sa tubig, evacuation center, mga ekipo alang sa emergency sama sa katalagman, pasilidad alang sa pagpundo og tubig-ulan, ug ingon man drug rehabilitation facility sa munisipyo.

Ang mga proyekto gitumong kini alang sa mga barangay, segun sa pamahayag ni DILG regional director Arnel Agabe sa interbyu ni Cyrill Garcia, USTP interns sa Sunstar Cagayan de Oro.

Ang Northern Mindanao nakasumiter na sa ilang priority list agig tuman sa pag-andam sa General Appropriation sa tuig 2018.

Buot sabton, mahimong wala sa priyoridad sa mga barangay o munisipyo kining siyam ka mga proyekto nga gipanghisgutan ni Agabe.

Apan, kon atong aninawon, pulos gyud importanti ug gikinahanglan kaayo ang maong mga proyekto nga gilatid sa DILG.

Hinuon, ang mga opisyal sa barangay ug munisipyo mao ang labing nasayod sa kahimtang sa ilang lugar ug kon unsang matang sa proyekto nga haom sa panginahanglan sa ilang mga molupyo.

Duna o wala bay konsultasiyon nga nahitabo tali sa DILG ug mga opisyal sa barangay ug munisipyo, kana dili pa nato matino.

Ang labing segurado karon mao nga giduso kining siyam ka mga priyoridad sa DILG subay sa plano sa kalamboan nga gipasiugdanan sa administrasiyon ni Presidenti Duterte.

Walay katarungan nga malangay pa ang pagpatuman niining mga proyekto kay, matod ni Agabe, gisangkapan kini og pundo.

Tingali, masabot nato ang pagkadelatar unya tungod kay usbon man sa mga munisipyo ilang mga priyoridad aron masubay ug mohaom sa giduso sa DILG.
Ang konswelo dinhi mao nga makaseguro ta ubos sa administrasiyon ni Duterte paspas gyud ang pagpatuman sa mga proyekto.

Karon, nga napublikar kining program sa DILG alang sa kabarangayan o munisipyo, kinahanglan alerto kanunay atong mga opisyal kay seguradong paninglan gyud sila sa mga molupyo.

Busa alang niadtong nag-antos tungod kay walay insaktong linya sa tubig nga ilimnon, niadtong naglisod sa biyahi tungod sa kakuwang og karsada ug tulay, niadtong walay mga pansayan ug kaligoanan, ug labi na niadtong may mga sakop sa pamilya nga nagkinahanglan ipa-rehabilitate tungod sa pagka-ungo sa drugas – gamay nalang nga pagpaabot aron maluagluag na unya inyong mga pagsakripisyo.


VIEW COMMENTS