HUMAN sa duha ka tuig nga wa na koy regular nga sikad, hinayhinay na kong mibalik. Gikinahanglan kong mobalik ning panahuna aron magpawala sa stressful nga dagan sa panahon.
Sa akong pagsikad niadtong Dominggo padung sa Cordova, akong nabantayan nga ang Metro Cebu sama na og Metro Manila nga di matug. Alas 5 pasado pa lang sa buntag, daghan nang mga pasahero ug sakyanan sa kadalanan. Lahi ra dihang nagsugod ko og sikad pito ka mga tuig ang nakalabay.
Usa sa mga hinungdan niini mao ang mga call center nga padayong nagtubo. Pero ang nakaanindot kay nagkadaghann sab ang mga tawo nga makita sa kadalanan nga nag-jogging ug nagbiseklita. Duna na koy nasugatan nga nag-bike padung sa bukid bisan medyo ngitngit pa. Naa say uban nga akong nasabayan og sikad.
Maayo ni nga tilimad-on tungod kay ning panahon sa unhealthy nga mga pagkaon ug stressful nga dagan sa nagkadaiyang environment, ang exercise dako kaayo og ikatabang. Gawas nga mawagtang ang toxins sa lawas, moandam usab ni sa imong panghuna-huna sa mga kalisod nga imong atubangon kay mogama ang imong lawas og hormones nga makaayo sa imong feeling.
Makapatay
Ang stress silent killer. Bisan mag-unsa ka ka conscious sa imong gipangkaon o gipangsulod sa imong tiyan, apan ang imong kinabuhi puno sa mga problema nga mosangko gihapon sa stress, dautan gihapon kini og epekto sa lawas. Mao bitaw nga makugang ka nga dunay giatake sa kasingkasing o naigo sa aneurysm bisan maayo ang ilang lawas.
Kon duna kay problema, usa sa maayo mao ang pag-share niini ngadto sa uban aron makapagawas ka sa imong emosyon. Pagpagawas sa emosyon makaayo sa imong kaugalingon. Gawas niini, ang exercise diin imong makaila ang uban nga sama kanimo og hilig, makapagana nimo sa paghimo niining regular, sama sa akong mountain biking. Daghan na kaayo kog mga higala nga kaniadto wa nako damha nga makaila ug akong mahimong suod.
Magbantay
Daghan sa mga tawo nga nagtrabaho og mga buhatan nga maayo og lawas tan-awon. Naay uban nga base sa mga medical exam, maayo ang tanang mga resulta. Bisan sa edad, wa maintenance nga tambal alang sa sakit, sama sa high blood pressure. Apan sa kalit lang, naospital ug ang uban nakutlo ang kinabuhi. Ang nakaingon, stress.
Diay, sa atong inadlaw-adlaw nga mga gimbuhaton, di malikayan ang stressful nga mga hitabo sud sa buhatan ug mismo sa pinuy-anan tungod sa pressure sa trabaho ug uban pang mga hinungdan. Bisan ang atong mga pulong ug aksyon, makamugna gani og stress sa uban kon atong patuyangan.
Mas maayong magbantay. Mas maayong mag-exercise kay ang maanindot nimong feeling, motakod kini ngadto sa mga pulong nga mogawas sa imong baba ug mga aksyon kay kining tanan bunga sa imong huna-huna. Feel good? Always exercise.