SECTIONS
Monday , June 18, 2018

Tambagi ko Noy Kulas: Paryente ra

Dear Noy Kulas,

Tawga lang ko og Tes, 19 years old. Estudyante ko sa college ug hapit na mo graduate.

Naa koy close friend nga first cousin ni mama nga kaedad ra nako. Close kaayo mi sukad sa gagmay pa mingbata. Ganahan na ko niya sukad pa kaniadto. Until nga na realize namo nga in love mi each other. Karon uyab na ming duha nga ang among parents, relatives ug friends wa makahibawo.

Unsa may akong buhaton, Noy, aron di mi masakpan? Okay ra kaha ning among relationship?

TES

Tes,

Wa man untay problema kon di pa mo dug-ol nga managparyente. Apan sa atoa gud nga kultura, unsay atoang naandan, nakalapas man kaayo na sa wa masuwat nga mga lagda. Mas kuyaw ni nga lapasaon kay makamugna ni og kagubot sa hingtungdang mga pamilya.

Duna nay mga kaso diin ang manag agaw og tagsa nagkauyab, nagpuyo ug nakabaton og anak. Naa sab koy nasugatan nga kaso sa magsuong babaye ug lalake nga nagpuyo na sa usa ka dapit dinhi sa Metro Cebu, apan sekreto. Ang ila rang mga higala ug tag-iya sa balay ang nakahibawo. Imagine unsay reaksyon sa pamilya kon kini mahitabo.

Samtang wa pa magbu­nga o kamo masakpi, mas maayong putlon na ninyo ang inyong relasyon kay wa nay maayong padulngan. Seguradong dunay mangasuko nga mga family member kon mahibaw-an ang inyong relasyon. Sakit man tuod pero angay usab ninyong huna-hunaon ang mamahimong bunga niiini kon inyong patuyangan ang inyong gibating duha. Maanindot man ang gugma, apan dunay mga lagda nga angay usab nga sundon ug tahuron, labina kon tipik na kini sa atoang kultura.

NOY KULAS

(Alang sa imong problema, e-mail sa kulassuper@sunstar.com.ph ug rojval69@yahoo.com)


VIEW COMMENTS