ANG Office of the Ombudsman nimando sa dismissal ni kanhi gobernador ug karon Cebu 3rd District Representative Gwendolyn Garcia tungod sa grave misconduct.
Kini nay kalambigitan sa isyu sa Balili Property nga giabunuhan og yuta human masuta nga dakong bahin niini anaa ilawom sa dagat ug dunay mangrove area.
Gimandoan ni Ombudsman Conchita Carpio Morales si House Speaker Pantaleon Alvarez sa pagpatuman sa dismissal order batok kang Garcia.
Apan si Alvarez niklaro nga di niya ipatuman ang mando.
Nakita sa Ombudsman nga sad-an ang kanhi gobernador sa Sugbo sa kasong grave misconduct tungod sa gihimo nga backfilling sa kontrobersiyal nga Balili Property sa Brgy. Tina-an, siyudad sa Naga.
Niadtong Hunyo 2008, gipalit sa Kapitolyo ang Balili Property sa kantidad nga P98.9 million, apan nadiskubrehan nga 196,696 square meters sa 249,246 square meters nga luna ang anaa diay ilawom sa dagat ug dunay bahin nga mangrove area.
Niadtong Abril 2012, nipahigayon og public bidding ang Provincial Government alang sa supply ug delivery sa mga materyales aron pag-abuno sa tubigan nga bahin ug mangrove portion.
Ang Supreme ABF Construction maoy nakadaog human nihatag sa lowest calculated bid.
Ni-release ang Kapitolyo og P24,468,927.66 ngadto sa kontraktor alang sa maong proyekto.
Apan sa gihimo nga imbestigasyon sa Ombudsman, nasuta nga wa diiay awtoridad gikan sa Hunta Probinsiyal ang pag-sulod ug kontrata ni Garcia isip gobernador sa Sugbo tali kontraktor.
Una nang gipasabot ni Garcia nga dunay P50 milyones nga gigahin ang Kapitolyo alang sa airport ug seaport project ug uban pang economic enterprise site development program, nga naapil usab sa 2012 Annual Budget sa Probinsiya.
Gitumbok sa Ombudsman nga bisan og balido ang maong tinubdan sa pondo alang sa proyekto, wala kini maghatag kaniya og awtoridad pagsulod ug kontrata tali sa ABF Construction alang sa backfilling sa Balili property.
Matod sa Ombudsman, nakalapas si Garcia sa Section 46 ug 47 sa Government Auditing Code of the Philippines nga nagtumbok nga kinahanglang dunay certification of appropriation ug fund availability kon mosulod og kontrata alang sa usa ka proyekto.
Dugang sa Ombudsman, naisyu lamang ang certification of available funds human nisulod si Garcia sa ikaduhang kontrata tali sa kontraktor.
Lakip sa silot sa dismissal order batok ni Garcia mao ang hingpit nga pagdili kaniya paghupot og bisan unsang posisyon sa gobiyerno, kanselasyon sa iyang eligibility, ug forfeiture sa iyang retirement benefits.
Pamulitika
“The timing of the Ombudsman’s Resolution to dismiss me from service is highly suspicious, and amount to a blatant attempt to strong arm me into helping her escape impeachment by the House of Representatives,” niingon si Garcia sa usa ka statement.
Nagduda siya nga gituyo ni Morales ang pag-dismiss kaniya tungod sa iyang kaaktibo sa lakang sa Ubos Balay Balauranan nga pagpa-impeach sa Ombudsman.
Matod niya, wa pa gani siya makadawat og kopya sa resolusyon ug wa sab siya mahatagi og higayon nga makaduso og motion for reconsideration.
Gihimug-atan ni Garcia nga duna sa’y bulok-politika ang maong kaso tungod kay si Gobernador Hilario Davide III ang nisang-at niini atol sa eleksiyon niadtong 2013.
Nanghinaot ang kongresista nga hatagan og pagtagad sa Ombudsman ang giduso usab niya nga kaso batok ni Davide tungod sa pagpabaya sa Cebu International Convention Center (CICC).
“I certainly hope that the Ombudsman will act on my complaint regarding Davide’s criminal neglect of the CICC with the same vigor and haste, and that the public would see through the Ombudsman’s blatant abuse of power to shield herself from being impeached and held accountable for her own questionable actions,” niingon si Garcia.
Di mopatuman
Sa report sa newsinfo.inquirer.net, si Alvarez niiingon nga siya di mopatuman sa mando sa Ombudsman.
Si Alvarez nipasabot nga ubos sa Batakang Balaud, wa siyay gahom sa pagpatuman niini.
Matod niya nga way gahom si Morales sa pagdisiplina ni bisan kinsang miyembro sa Ubos Balay Balauranan.
Wa usab kini legal nga basehanan tungod kay ang mando uwahi nang giluwatan kay si Garcia napili na isip kongresista samtang ang giingong kalapasan niadto pang siya gobernador sa Sugbo.
Sa laing bahin, nakita usab sa Ombudsman nga sad-an sa simple neglect of duty ang laing respondent sa kaso nga si kanhi Provincial Accountant apan karon Provincial Treasurer Emmanuel Guial.
Kini nunot sa pag-certify sa disbursement voucher nga kumpleto ang dokumento bisan og kulang kini og awtoridad gikan sa Hunta Probinsiyal nga nagtugot kang Garcia pagpirma sa kontrata, isip representante sa Kapitolyo.
Gipahamtangan siya og tulo ka buwan nga suspensiyon sa serbisyo.
Ang kaso sa ubang respondents nga kabahin usab sa Bids and Awards Committee nga silang Marivic Garces, Bernard Calderon, Dr. Manuel Purog, Emme Gingoyon, Maria Junelene Arenas, Cristina Giango, Rosalinda Jao ug Acting Provincial Treasurer Roy Salubre gibasura tungod sa kakuwang sa basehanan.