SECTIONS
Tuesday , May 22, 2018

Editoryal: Sekretong tigom?

MAAYONG pag-abot sa "Harang Dakbayan sa Habagatan" tanang lokal nga opisyal gikan sa Kabisay-an ug Mindanao, lakip sa mga opisyal sa Autonomous Region of Muslim Mindanao (ARMM).

Hinaut nga dili kamo sama sa lokal nga media nga blangko bahin sa kasayuran kon nganong gipatawag kamo ni Presidente Rodrigo Duterte sa tigom nga ipahigayon sa Radisson Blu Hotel sa Reclamation Area.

Bisan si Rene Burdeos, Direktor sa Department of Interior and Local Government (DILG) 7, kinsa niisyu sa urgent memorandum sa tanang city ug provincial directors sa rehiyon sa pagseguro nga motambong sa lokal nga chief executives sa naasoy nga tigom, walay kasayuran sa agenda ni Duterte.

"Maybe his crusade for good governance and fight against graft and corruption. Or maybe about operations against illegal drugs. We don't have the exact and accurate idea (on what the President will discuss," matud ni Burdeos sa taho sa SunStar Cebu.

Ang Buhatan sa Presidente ug Presidential Communications Operations Office (PCOO) ni Kalihim Martin Andanar wala usab moluwat og igong pamahayag bahin sa hisgutan sa tigom karong adlawa. Sama kang Burdeos, ang publiko dunay nagkalainlaing hugon­hugon, bahin ba kaha kini sa pagduso sa pederalismo nga porma sa kagamhanan o ang pagbalik sa bag-ong kampanya batok sa ilegal nga druga nga Tokhang.

Pamaagi sa pag-usab sa Batakan Balaod? Dili ba kaha ang pagpangandam sa eleksiyon karong Mayo ning tuiga? Ang wala pagbutyag sa hisgutanan sa tigom ni Duterte nakapasamot sa interes sa publiko sa pagpakigsayod sa resulta sa tigom, labi na ang media.

Dugang pa, sekreto ang tigom human closed door kini? Hinuon, seguradong matubag ang atong mga pangutana sa dili pa mosalop ang adlaw karon.


VIEW COMMENTS