SECTIONS
Sunday , May 27, 2018

Alerto sa bagyo

HUGOT ang weather monitoring sa Davao City Disaster Risk Reduction and Management Office (DDRRMO) sa mga dapit nga posibleng bahaon ugaling mokusog ang pagbunok sa ulan dala sa pag-landfall sa Bagyong Basyang karong buntag.

Ang Operation and Warning Section sa DDRRMO nagbutyag nga posibleng dunay mga pagbaha kung moapaw ang tubig sa Davao River sa pagtigom sa tubig ulan gikan sa mga lugar sa Davao City nga ulanon hatud sa bagyo.

Gipahimangnoan sa DDRRMO ang tanang barangay disaster response units nga kanunayong i-monitor ang ilang mga dapit labi na sa mga danger zone areas ug andam ang preemptive evacuation kung gikinahanglan sa mosunod nga mga oras.

Naka-standby sab ang mga personahe sa Central 911 sa higayon nga kinahanglan nga moresponde sa mga dapit nga bahaunon.

Biyahe sa Samal

Magdepende sa dagan sa panahon karong adlawa ug sa umaabot nga mga adlawa ang pagsuspende sa Philipphine Coast Guard (PCG) Davao sa mga biyahe sa mga motorized banca ug sa mga barge sa kadagatan sa Davao Gulf nunot sa pag-landfall sa Bagyong Basyang karong adlawa.

Kini ang gibutyag ni PCG-Davao Commander George Maganto human ilang gisuspende sugod kagahapon ang mga Island hopping sa Talicud, Island Garden City of Samal.

"Open sea na kasi ang nasa likod ng Talicud, Igacos. Ang mga Island hopping, doon talaga yan dadaan at hindi natin alam lalakas ang mga alon," ingon ni Maganto.

Sumala ni Maganto nga ang Island hopping pa lamang ang wa gipalawig, apan ginatugutan pa ang pagbiyahe sa mga barge ug mga lantsa paingon ug pabalik sa Samal gikan Davao City.

Subay sa advisory sa Office of the Civil Defense (OCD) Davao Region, bisan ug napailawom sa signal No. 1 ang Davao del Norte, Compostela Valley Province, ug Davao Oriental, walay gideklara nga suspension sa klase sa Davao City, Mati City, Digos City, ComVal Province, ug sa Malita DavOcc.

Una niini ang Philippine Atmospheric, Geophysical and Astronomical Services Administration (Pagasa) nagdeklara og signal No. 1 sa pipila ka bahin sa Mindanao nunot sa pagsulod sa Bagyong Basyang karong adlawa.

Base sa bulletin sa Pagasa alas 11 sa buntag kagahapon, si Basyang anaa sa 620 kilometros sa sidlakan habagatang-sidlakan sa Hinatuan, Surigao del Sur, nga naglihok sa gikusgong 22 kilometros matag oras padung sa kasadpan amihanang-kasadpan gikan sa gikusgon niini nga 25 kilometros matag oras.

Ang OCD-Davao padayong nagmonitor sa mga dapit nga ulanon aron daling ma-rescue ang mga residente ugaling matigayon ang mga pagbaha.


VIEW COMMENTS