SECTIONS
Friday , May 25, 2018

Janao nagbangis sa Assumption

GISAKWAT ni Milo Janao Jr. ang Assumption Montessori School (AMS) Jaguars pagkompleto og grandslam agi sa 83-79 nga paglingkawas batok sa archrival Corpus Christi School (CCS) Knights atol sa SM NBTC Cagayan de Oro Leg final niadtong Biyernes nga gipahigayon sa Xavier University gym.

Nakuha ni Janao og 34 puntos aron mangulo sa opensiba sa Jaguars, samtang niabag sab sila John Piniero ug Christian Russel Hosain og 17 ug 11 ka marka, sunod-sunod.

Naunhan pa sa Knights ang Jaguars sa unang duha ka quarters ug nakabinat pa sa ilang pinaka taas nga labaw nga 11 puntos sa wala pa mahuman ang first half sa iskor 39-34.

Apan, gipukaw ni Janao ang iyang mga kauban ug naangkon dayon nila ang unang tilaw sa labaw, 52-50, agi sa iyang tres sa 3:30 minutos sa third quarter.

Nakabinat pa ang Corpus og unom ka puntos nga labaw agi sa 73-67, sa kataposang fourth quarter apan napanas kini agi paghasik ni Janao og 5-0 run.

Misuway pa pag-apas ang Corpus human miinat sila og upat ka puntos nga labaw sa kapin dos minutos nabilin, 77-73, apan wala nila masustinar.

Nibida sila Piniero ug Rjone Maybuena pagtabla sa dula aron mosulod og kulbahinam nga endgame ug igong buylo labina nga naa na sa penalty ang Knights sa 2:29 minutos nabilin sa dula.

Nakauna dayon ang Jaguars agi sa duha ka freethrows ni Janao, apan wala magdugay natabla kini ni Artazo sa 79-tanan agi sa iyang acrobatic lay-up sa 34 segundos nabilin.

Dako kaayo ang bili sa kataposang time-out nga gitawag ni AMS coach James Racines aron mohatag og igong mando kang Janao sa nahibiling oras.

“Ako siya giingnan nga naa sa iyang kamot ang kadaogan ug mabali ang hangin ngadto sa Corpus kung dili mosulod,” ingon ni Racines.

Sa ingnana, gipagawas ni Janao ang iyang dughan sa usa ka kampyon human makakita og mismatch batok sa depensa sa Corpus agi pag-drive niya ngadto sa ring ug paglabaw sa Jaguars, 81-79, sa 26 segundos nabilin.

Naay tsansa matabla sa Corpus ang dula apan wala masulod ni Chris Emmanuel Ocangas ang iyang shot duol sa ring ug napugos sila pagkuha og foul kang John Lloyd Pagara sa unom ka segundos nabilin.

Giseguro ni Pagara ang iyang duha ka freethrows aron matuldokan sa Jaguars ang kadaogan.

Nangulo sab si Luc Ashton Artazo og 25 puntos sa kapildehan sa Corpus, samtang nihatag sab si Jovanne Jacutin og 23.

Mosangka pa ang Assumption sa regional final karong Pebrero 16 diin ang modaug moabante sa division 2 sa national final.


VIEW COMMENTS