SECTIONS
Sunday , May 27, 2018

Sugilanon: Valentina nga gi-reserba

Fred Fuentes Monternel
Lorega Proper, Cebu City

PUNO sa kahinam si Cesar nga mikanaog sa taksi sa paghitungod sa casa nga nadumdoman niya sa miaging semana. Gabii karon sa Valentine’s Day. I-tsik-awot niya karon ang napilian niyang babaye nga naglublob sa maong casa. Sa miaging semana, maayong pagkasinabot ni Cesar sa upaw nga lalaking tagdumala sa casa sa presyo sa napilian niyang babaye nga I-tsik-awot sa casa. Espisyal niyang gipa-reserba ang maong babaye. Sa hulagway lang gipaagi ang pagpili ni Cesar sa maong babaye. Sa usa ka anggulo sa litrato nagtakilid kini; sa lain, nagtalikod. Nakita ni Cesar ang kaanindot sa lawas niini.

“Nindot siyang bayhana, Bosing!” matod sa upaw. “Gwapa, bigot ug porma kaayog lawas. Pun-an pa sa hamis ug puti nga kutis. Di ka magmahay sa pagpili niya. Morag hotcake siya kakusog sa mga lalaking kustomer. Mahal man tuod ang iyang presyo, apan eswak ug tagbaw ka.”

“Okey. Game ko niya, Bosing. I-reserba siya para nako sa Valentine;s Day,” ni Cesar.

“No probs, Bosing. Pero mo-adbans kag downpayment nga katunga sa iyang presyo nga diyes mil pesos para sa one-night stand!” naniguro gyud ang upaw nga tagdumala sa casa.

Gikumpetohan pagbayad ni Cesar ang tagdumala dihang nakasulod na siya sa casa. Mapahiyumon ang tagdumala. “Ganiha ka rang gipaabot sa napilian mong ka-deyt karong gabhiona, Bosing. Adlaw karon sa Gugma ug magmalipayon gyud ka uban kaniya.”

“Ako nay bahala sa tip niya, Bosing,” ni Cesar. Maila sa iyang panagway nga kundisyon kaayo siya alang sa Valentine romance uban sa Valentina nga gi-reserba para kaniya.

“Okey, Bosing. Sa gikaingon ko na, di ka magmahay uban kaniya atol sa Valentine’s Day. Nindot gyud siyang pagka babaye. Tua siya, nag-inusara na lang nga naglingkod sa sopa, kay ang iyang mga kauban pulos na nanggawas kuyog sa ilang mga deyt.”

Puno sa kadasig nga giduol ni Cesar ang babaye nga guwapa, bigot ug porma kaayog lawas. Apan kalit kining nahatindog gikan sa gilingkurang sopa dihang nakakita kaniya. Nagkatinutokay sila.

“C-Cesar...!” sa babaye nga nahasiga ang mga mata sa kahibulong.

“J-Joy...!” kusog nga nalitok ni Cesar ang ngalan sa babaye.

Unya hugot nga gigakos ni Cesar si Joy, ang gikamingawan niyang hinigugma didto sa ilang barangay sa Bucana, siyudad sa Davao. Biktima si Joy sa pagpanglugos sa iyang uyoan nga drug pusher. Kalit nga mibiya si Joy sa siyudad sa Davao nga wa magpahibawo kang Cesar. Maulawon nga migakos si Joy kang Cesar.

“Mikabat nag tunga sa tuig ang pagpangita ko nimo dinhi sa siyudad sa Sugbo, Joy! Bisan sa nahitabo kanimo, ikaw pa gihapon ang matuod kong gugma. Ikaw ang akong Valentina karon. Haw-ason tika dinhi sa casa aron magpakasal ta!”

“Sar! Sar!” yagubyob ni Joy nga naghilak ug hugot na kaayong migakos kang Cesar.

Gigunitan ni Cesar ang suwang ni Joy ug gipahangad. Unya ang uhaw niyang mga ngabil miukob sa naghulat nga mga ngabil ni Joy. (Katapusan)


VIEW COMMENTS