SECTIONS
Monday , June 18, 2018

78 ka pamilya gipabakwit; 1,500 stranded

LIBOAN na ka mga pasahero ang stranded samtang gatusan ang mga sakyanan sa dagat ang wa pabiyahia kagahapon tungod sa hulga sa bagyong Basyang.

Niabot sa 1,560 ka mga pasahero ang stranded sukad giisa sa Philippine Atmospheric, Geophysical and Astronomical Services Administration (Pagasa) ang gale warning atol sa pagsulod sa bagyong Basyang sa kadagatan sa Bisayas diin lakip ang Sugbo nga apektado.

Samtang sa pagkutlo ning balita, nakatala na ang Cebu Provincial Disaster Risk Reduction Management Office og 78 ka mga pamilya nga gipabakwit gikan sa tulo ka mga lungsod.

Lakip niini ang 64 sa Alegria, unom sa Boljoon, ug walo sa Ginatilan.

Matod ni Deputy Comman­der sa Cebu Coast Guard Ensign Ronnie Eras nga alas 12:00 sa udto kagahapon, niabot na usab sa 38 ka mga vessel/motorbanca ingon man 233 ka mga rolling cargos ang wa nila pabiyahia.

Dugang ni Eras nga ang maong mga biyahe paingon sa Bohol, Negros Oriental, Leyte, Iloilo, lakip ang mga isla sa Sugbo sama sa Bantayan ug Camotes.

Tambag niya sa mga pasahero nga nagplano nga mobiyahe karong adlaw sa gugma nga magmabinantayon lang sa panahon ingon man maghuwat sila nga libkason sa Pagasa ang gale warning aron ang Coast Guard usab makalibkas sa ilang suspensyon sa biyahe sa mga sakyanan sa dagat.

Samtang kagahapon sa alas 2 sa kaadlawon dihang nisaka sa Signal No. 2 ang habagatang Sugbo lakip na ang silingan nga mga lalawigan niini sa Bohol, Siquijor, Neros Oriental ug Southern Leyte.

Nagpabilin ang gidala nga ha­ngin niini sa 65 kilometros matag takna, unos sa 80 kilometros ug pag-irog niini sa 25 kilometros.

Alas 9:15 sa buntag dihang ni landfall si Basyang sa Cor­tes, Surigao del Sur.

Samtang gilibkas na tanang signal warning no. 2 ug nagpabilin na lang ang signal no. 1 sa alas 11 sa buntag kagahapon.

Pasado alas 5:00 sa hapon dihang nakompirmar usab sa Tagbilaran Coast Guard Station nga luwas na ang 15 ka Chinese national nga sakay sa usa ka motorbanca nga gikan sa Cabul-an Island nga paingon unta sa Cebu.

Susihon pa sa Tagbilaran CGS ug mohimo kini og imbistigas­yon nganong nisuway pagbiyahe ang maong motor banca nga giisa pa man ang gale warning kagahapon sa alas 2:30 sa hapon dihang nisuway kini pagbiyahe.

Si Tagbilaran CGS deputy commander Nygel Pia nagkanayon nga undocumented ang maong motorbanca.

Niadtong Lunes pa lang sa buntag, giisa na ang Signal number 1 sa tibuok Sugbo ug duna say giluwatan nga Gale warning ang PAGASA nga nagdili unta pagpalawig sa bisan unsang sakyanan sa kadagatan.

Napalgan

Samtang napalgan sa Barangay Anapog, San Remigio. amihanang Sugbo ang usa ka mananagat nga gitaho nga missing kagahapon sa buntag.

Matod ni local disaster management officer Gemma Villamor nga gipadpad si Demetrio Booc, 49, samtang nanagat sa Medellin niadtong Lunes.

Kagahapong adlawa, makita ang taas nga linya sa mga sakyanan paingon sa Liloan Port. Anaa usab ang daghang pasahero nga nangatanggong.

Wa sila makasakay sa mga roro ug barge human gikanselar ang biyahe sa tanang matang sa sakyanan sa kadagatan nunot sa bagyong Basyang.

Kapulisan gipaalerto, labina sa southern Cebu. (HBL, AZDL, SC, AYB)


VIEW COMMENTS