SECTIONS
Sunday , May 27, 2018

Underpass iuswag: MCCI

NANGAYO og detalyado nga traffic management plan ang mga magpapatigayon kan­sang mga negosyo maapektuhan kon sugdan na ang pagtrabaho sa P711.8 mil­yones nga depressed structure o underpass sa UN Avenue, siyudad sa Mandaue.

Gusto sa pipila ka mga sa­kop sa Mandaue Chamber of Commerce and Industry nga iuswag una ang pagpatuman sa proyekto sa kabalaka nga mosamot ang kahuot sa dagan sa trapiko sa UN Avenue.

Si Engineer Nonato Paylado, pangu sa planning and design division sa Department of Public Works and Highways, nipa­salig nga dili sugdan ang pro­yekto kondili mauyonan sa maapektuhan nga mga sektor ug local government units ang TMP.

Ang 800 metros nga underpass magsugod sa atubangan sa St. Peter Funeral Homes sa UN Avenue, dakbayan sa Mandaue hangtod duol sa Marcelo Fernan Bridge.

Aduna kini upat ka lanes, duha ka lanes paingon sa airport ug duha ka lanes pai­ngon sa Pacific Mall. Ibabaw sa underpass, may upat usab ka lanes, duha ka lanes sa tuo ug duha ka lanes sa wala.

Atol sa tigom sa Mactan-Cebu Bridge Management Board kagahapon sa Casino Español, si Glenn Soco, chairman sa Infrastructure Development Committee sa Regional Deve­lop­ment Council 7, niklaro nga wa sila’y pagsupak sa proyekto.

Apan nabalaka sila kay way TMP nga napakita ang DPWH 7 ug ang nidaog nga bidder, ang B.M. Marketing sa Leyte.

Si Mactan Cebu International Airport General Manager Steve Dicdican nisugyot nga kinahanglan dunay vehicle counts nga himuon, sama sa kon pila ka mga sakyanan ang moliko sa wala, tuo o mo-straight lang og biyahe, sa dili pa sugdan ang proyekto. (SCG)


VIEW COMMENTS