SERYUSO nga gikonsiderar ni Kongresista Gwendolyn Garcia sa 3rd district sa lalawigan sa Sugbo ang pagpapili na usab pagka-gobernador sa Sugbo sa 2019 elections.
Kini taliwala sa nigawas nga desisyon sa Ombudsman nga nagtaktak niya sa katungdanan tungod sa gihimo nga backfilling sa Balili Property.
Ang maong kaso nga gisang-at ni Gobernador Hilario Davide III ug Bise Gobernador Agnes Magpale niadtong 2013, gitumbok sa opisyal nga gigamit sa kasamtangang gobernador aron piangan siya ug di na makadagan atbang kaniya.
Wa pa gihapon makadawat si Garcia sa kopya sa desisyon sa Ombudsman nga nagtaktak kaniya tungod sa grave misconduct apan gipaniguro niya nga himuon ang tanang legal nga lakang aron pagbali sa una nang desisyon sa anti-graft office.
Atol sa interview ni Garcia sa sibyaanang dyHP, gipadayag sa kanhi gobernador nga bisan sa maong desisyon, seryoso niyang gikonsiderar karon ang subling pagpapili isip gobernador sa Sugbo atbang kang Davide.
Sa wa pa nahimong kongresista, nagsilbi nga gobernador sa Sugbo si Garcia gikan sa 2004 hangtod sa 2013.
Tungod kay usa si Davide sa mga nikiha kaniya sa Ombudsman labot sa backfilling sa Balili Property, dako ang pagtuo ni Garcia nga naka-impluwensiya usab ang gobernador sa desisyon ni Ombudsman Conchita Carpio-Morales, kinsa tinudlo sa kaalyado ni Davide nga si kanhi presidente Benigno Aquino III.
Gihulagway ni Garcia si Davide nga nahadlok kaniya kon sila’y mag-atbang sa sunod nga eleksiyon nunot usab sa iyang gitumbok nga pagpasagad niini isyu sa Cebu International Convention Center, Cebu Provincial Detention and Rehabilitation Center ug sa giingong kakuwang sa mga proyekto ug programa nga nahimo niini.
“Mao sad na’y usa ka rason nga forces are working, gamit ang ilang mga impluwensiya nga aron iya kong piangan kay akong nadungog nga ang naglingkod karon nga gobernador, nahadlok kon ako ang modagan. Ang pangutana kon modagan ba gyud ko pagka-gobernador. Ako ni timbang-timbangon. Nakakita na ko sa gibagsakan sa atong Sugbo karon,” padayag ni Garcia.
Wa na manumbaling si Davide niini.
Matod niya, nakahimo na sa desisyon ang Ombudsman ug mas maayong mopahimulos na lang si Garcia sa mga remedio sa balaod nga mahimo niyang magamit pag-alkontra sa dismissal order batok kaniya.