SECTIONS
Thursday , May 24, 2018

PCC Maramag nakalingkawas batok XU

NAHUMAN nga walay tatsa ang Philippine Countryville College (PCC)-Maramag sa bracket A human makalingkawas kontra sa Xavier University (XU) agi sa 87-85 nga daug sa overtime atol sa 13th Loyola Cup college men’s division niadtong Domingo sa XU gym.

Nibira si Dennis Barbon og 35 puntos aron mangulo sa kadaogan alang sa PCC, samtang nihatag sab sila Mark Abadilla ug Wendilou Sillar og 12 ug 10 ka puntos, sunodsunod.

Nakontrolar sa PCC ni coach Michael Oliveros ang XU Crusaders ni coach Rocky Calingin sulod sa unang tulo ka quarters.

Tungod sa kahuyang sa depensa sa Crusaders nga kanunay lutsan mao nga gitugtan nila ang PCC nga makabinat sa ilang kinataas nga labaw nga 13 puntos sa third quarter, 59-46.

Natubag ra ni Calingin ang suliran human gidungan niya ang twin towers nga sila Mario “Swiss Bull” Piatti ug John Rey Manatad sa kataposang fourth quarter.

Gawas ana, ang tres nila Archie Manosa ug CJ Maagad maoy nagpatabla sa dula sa 1:59 minuto nabilin sa iskor 75-tanan.

Duol na modaug ang Crusaders human makalabaw sila og duha agi sa lay-up ni Manosa sa 59 segundos, apan nabaslan kini ni Sillar sa 14 segundos nabilin sa maong quarter.

Wala makaporma ang XU sa nahibiling segundos ug napugos sila ngadto sa overtime, 77-77.

Gikan sa 81-79 nga labaw sa XU, nakabuylo ang PCC agi paglangsang ni Barbon sa tres ug molabaw og usa.

Napaingon pa sa lima ka puntos nga labaw sa 15 segundos nabilin, apan dili pa lang gihapon haum ang labaw diin nitusik pa ang XU.

Nipaduol pa sila sa duha ka puntos nga biya, 85-87, human gipalumos ni Van Laurence “Shan Lau” Tindoy ang iyang tres sa walo ka segundos nabilin.

Naay tsansa ang Crusaders matabla ang dula human makalangkat og steal si Manosa gikan sa inbound pass sa PCC ug gipasa niya diretso kang Manatad, kinsa nakakuha og foul anang puntoha sa tres segundos nabilin ug mosulay pagsulod sa iyang duha ka charity shots.

Apan, nahugno ang tsansa sa XU human wala mapasulod ni Manatad ang iyang freethrows.

Nahuman ang PCC nga adunay 3-0 win-loss card, samtang naa sa ikaduha nga pwesto ang XU nga adunay tagsa ka daug ug pilde sa bracket A.

Sa pikas bahin, gilatos sa Professional World Academy (PWA) ang Iligan Medical Center College (IMCC), 105-82.

Naa na sa ikaduha nga pwesto ang PWA sa bracket B sunod sa nag-una nga Southern de Oro Philippines College (SPC) Sharks nga nahuman nga walay pilde.


VIEW COMMENTS