SECTIONS
Wednesday , May 23, 2018

Babaye nga naligsan naila na

NAILA na ang usa ka babaye kinsa usa sa mga gidaro sa sakyanan niadtong Martes sa kaadlawon sa Velez-Gomez Streets, dakbayan sa Cagayan de Oro nga miresulta sa kamatayon niini.

Ang biktima mao si Delia Silmonan, 55, minyo.

Basi sa report sa Police Station 1 (PS1) sa Divisoria nga giila sa pamilya niini ang patay nga lawas sa biktima sa pagtaho sa estasyon.

Samtang ang laing biktima nga si Joseph Ampong, 52, ug residente sa Barangay 24 nagpabilin pa nga gi-obserbahan sa tambalanan sa Northern Mindanao Medical Center.

Kahinumdoman nga gidaro sa pribadong sakyanan ang duha ka mga biktima kinsa nagbaklay sa kadalanan sa nahisgutang dapit nga gimaneho sa suspek nga si Ryan Dimakuta, 26, kinsa residente sa Alawi compound Port Area sa Iligan City, kinsa usa ka empleyado sa Mindanao State University ug usa ka museum researcher.

Sa inisyal nga imbestigasiyon sa kapulisan, migawas nga naka-inom sa ilimnong makahubog si Dimakuta kinsa misulay pa sa pagsibat human nabanggaan ang duha ka mga biktima ug nakabangga pa kini og laing sakyanan hinungdan na usab nga namatikdan sa kapulisan ug malampusong nasikop.

Sa pagsulat niini nga balita, pabilin pa nga anaa sa Maharlika Detention Cell ang suspek.


VIEW COMMENTS