SECTIONS
Friday , May 25, 2018

Dura: Persona non grata

NAGLUKSO-LUKSO sa tumang kalipay ang mga Dabawenyo kinsa napungot sa gihimo ni Senador Antonio Trillanes IV nga pagpakauwaw ni Pangulong Rodrigo Duterte dihang gideklara sa Davao City Council nga "persona non grata" ang senador dinhi sa siyudad.

Ang konseho miapruba sa resolution nga giduso ni Vice Mayor Bernard Al-ag kagahapon, Pebrero 13, atol sa regular session.

Ang resolusyon nagkanayon: "Mr Trillanes, Dabawenyos are furious and angry with your words and with your action... We do not need you here in Davao City. You are unwelcome and unwanted in our city of Davao. You have not done anything good at all to our city!"

Kini nga lakang miguwa human si Trillanes, kinsa giilang kritiko sa Pangulo, nagdaut sa siyudad sa usa ka tigum nga giorganisa sa Filipino-American Human Rights Alliance didto sa Chicago niadtong Pebrero 9.

Sa maong forum gisulti ni Trillanes nga ang siyudad sa Davao maoy pinakadelikado nga lugar diin taas kaayo ang kasong murder ug lugos subay sa report sa Philippine National Police (PNP).

Apan, suma niya, gibalewala lamang kini sa mga Dabawenyo nga gipatuo sa kanhi Mayor ug karon Pangulo sa nasud nga ang siyudad maoy pinakalabing hapsay ug malinawon nga siyudad sa kalibutan.

Alang sa mga konsehal sa siyudad, wa gikinahanglan si Trillanes ngari, mao nga ila kining gideklara nga persona non grata.

Pipila sa akong mga higala nga nakapatalinghog sa maong balita kagahapon miingon nga: mirise niya.

Duna pay miingon nga di pa paigo ang pagdeklara nga persona non grata sa senador, kay alang nila mas maayong panitan ang opisyal.

Buot ipasabot nga grabe gayud ang kapungot nga gibati sa mga Dabawenyo nga nagmahal sa Pangulo sa Pilipinas.

Suma sa akong mga nahinabi, ang gihimo ni Trillanes insulto sa mga Pilipino nga miboto ug misalig sa katakus sa Pangulo busa angay nga panghimarauton ang senador.

Di nato mabasol ang mga Dabawenyo nga mobati niini tungod kay sukwahi man ang gisulti ni Trillanes sa nahitabo dinhi.

Apan di sab nato mabasol ang senador tungod kay nia kita sa demokrasya nga nasud diin mamahimo nga makapadayag ang si bisan kinsa sa iyang kritisismo sa labot pagdumala sa mga opisyales sa gobyerno.

Alang nako, ang kritisismo maoy labing nindot nga basehan sa gobyerno sa pagplano sa iyang mas epektibo nga mga programa ug proyekto nga makapaalsa sa kalidad sa kinabuhi sa mga Pilipino. Di kini angay nga ikasuko sa mga dumadapig sa mga politiko.

Hinaut nga magsinabtanay ug maghinigugmaay ang tanan. Happy Valentine's Day.


VIEW COMMENTS