SECTIONS
Friday , May 25, 2018

Eleksiyon ug plebisito gipaabot nga hisgutan

CEBU CITY -- Siyam ka oras nga gihuwat sa mga mayor sa Mindanao ug Visayas si Presidente Rodrigo Duterte sud sa Radison Blu Hotel sa dakbayan sa Sugbo niadtong Lunes.

Unang giadto ni Presidente Rodrigo Duterte ang Vicente Sotto Memorial Hospital diin siya ang nangulo sa cutting of ribbon sa bag-ong pasilidad niini una milahos sa kapin 800 ka mga opisyal nga gilangkuban sa mga gobernadora ug mayor sa Visayas ug Mindanao.

Mitambong sab sa tigum nga gipatawag sa Department of Interior and Local Government (DILG) sila si Davao Occidental Governor Claude Bautista ug Davao del Sur Governor Douglas Cagas.

Nakahigayon sab si Bautista ug Davao City Mayor Sara Duterte sa ilang lahi nga tigum diin wa na gibutyag sa gobernador ang ilang nahisgutan.

Sa wa pa nagsugod ang tigum, nagtagbo sab sila si Digos City Mayor Joseph Peñas ug Cagas nga iladong magkalaban sa politikanhong kalihukan.

Apan miangkon ang mayor nga hinay-hinay nang nauli ang kanhi di maayong relasyon nila kaniadto human gipakita sa gobernador ang nindot nga pagtagad niini kaniya.

Samtang si Magsaysay Mayor Arthur Davin nagpaabot nga hisgutan ni Duterte ang bahin sa taliabot nga barangay eleksiyon ug kon aduna bay mahitabong plebisito sa pag-usab sa Konstitusyon.

Si Kiblawan Mayor Jason Rama aminado nga naghinam-hinam silang masayran kon kanus-a mahitabo ang Pederalismo ug andam silang suportahan kini aron mas paspas nga kalambuan ang ilang maangkon.

Apan, wa gipalapdan sa pamuno nasud ang maong hisgutanan ug mas gidut-an niini ang pagsumpo sa druga.

Gipasidan-an sa pamuno nasud ang mga gobernador ug mayor sa Visayas ug Cebu nga aduna gihapoy taas nga suliran sa druga diin apil ang mga pulis.

Giklaro ni Duterte nga angayang gamiton sa mga opisyal ang kapulisan sa pagsulbad niini ug ipahibawo kaniya kon adunay mosupak nga pulis.

Gihatagan sab og pasidungog ni Duterte ang kapulisan sa Police Regional Office-Central Visayas human nasamdan dihang misukol ang suspek nga gisikop sa druga ug gitambagan nga pakusgan pa ang kampaniya.

Apil nga gihisgutan niini ang Pederalismo, terorismo ug pagsulbad sa kurapsiyon diin daghang mga opisyal ang mipadayag og suporta sa plano.

Matud ni Davao del Sur League of Municipal Mayors of the Philippines president ug Hagonoy Mayor Conrado Laza nga dako'g ikatabang ang Pederalismo sa paghatag og mas nindot pang serbisyo sa publiko. (Orlando B. Dinoy)


VIEW COMMENTS