SECTIONS
Friday , May 25, 2018

ISIS gipanid-an sa militar, pulis

MAGUINDANAO -- Gipalig-on pa sa mga awtoridad ang paglutos sa mga lokal nga miyembro sa Islamic State of Iraq and Syria (ISIS) sa probinsiya.

Niadtong Pebrero 12, alas 5:00 sa buntag, gironda sa hiniusang puwersa sa 57th Infantry Battalion, 2nd Mechanized Infantry Battalion, 601st Infantry Brigade ug kapulisan ang gilubluban sa mga miyembro sa Bangsamoro Islamic Freedom Fighters (BIFF) didto sa Barangay Pandi, Datu Salibo sa nahisgutang probinsiya.

Target sa operasyon sila Mama Mamantal, Leng Mamantal ug Tato Silongan nga giingong mga tuong kamot ni Kumander Abu Toraifie sa BIFF/ISIS Inspired Group.

Apan wala pa gani makaabot ang mga sundalo ug kapulisan sa target nga lugar, nakaipsot na ang mga terorista.

Narekober sa gitagoan sa mga suspek ang mga high-powered firearms nga gilangkuban sa usa ka US M16 caliber 5.56 rifle, US M2 carbine, usa ka M14 rifle, granada, mga bala ug mga dokumento.

Gawas sa mga terorista, tumong sab sa law enforcement operation ang mga armadong grupo nga kanhi mga private army ni kanhi Maguindanao Governor Datu Andal Ampatuan Sr.

Kahinumdoman nga gihagit ni Governor Esmael Mangudadatu ang militar ug kapulisan nga sikupon ang mga nahibilin nga suspek sa mangilngig nga masaker sa Sitio Masalay, Barangay Salman, Ampatuan nga mikalas og 58 ka kinabuhi apil na ang 32 ka mga sakop sa media. (Edgar E. Fuerzas)


VIEW COMMENTS