SECTIONS
Wednesday , May 23, 2018

Valentine's Day Special: Lipstick

GIINGON nga ang gugma mapasensiyahon, ang gugma kaantigo maghulat, ug labaw sa tanan ang gugma way gipili.

Kining tanan, naglimin sa istorya sa paghigugmaay sa duha ka binuhat nga wa igsapayan ang pagbiay-biay kanila sa katilingban, inay nadasig sila sa usa'g-usa kanila nga maoy hinungdan nga mitubo ang tinisok nila nga liso sa pagbati ug namunga kini.

Nailhan siya nga Jopay sa iyang gitrabahoan nga parlor sa Davao City, ilado sab siya nga Princess Verdana Rivera panahon sa gabii, dihang iyang papelan ang kinabuhi isip usa ka stand-up comedian.

Garbo nga usa ka binabaye ug alang niya, bisan mabaliktad pa ang kalibutan, lalaki gihapon siya, apan, huyang ang pinitik sa kasingkasing nga mopaspas lamang ang pagpitik niini ngadto sa mga ambungan.

Sa iyang pagharong sa mga pagsulay sa kinabuhi, bugtong nakapagaan kaniya mao ang panaghigalaay sa pipila ka sama niya nga binabaye, diin nahitabo nga nagustohan niya ang usa ka higala niya nga binabaye, ug nahimong sila sa pipila lamang ka bulan.

Kay giingon nga way gipili ang gugma, usa ka higayon niana, ang iyang higala nga binabaye gipaila-ila kaniya si Matsay, kinsa mao si Maristy Natividad sa tinuod nga kinabuhi, usa ka tomboy, nga di maingon ug di katuohan nga binabaye sab diay ang gusto.

Higayon nga gihatagan ni Jopay og kagawasan ang kasingkasing nga mahigugma pag-usab, ug gisulayan niini nga mahigugma og tomboy.

Ug tuod man, pinaagi sa pag-chat nila sa messenger, didto na nagsugod nga mipitik ang ilang tagsa ka mga pagbati, ang pagsabot sa ilang tagsa ka sitwasyon ug nagtuo nga ang lalaki alang gayud sa babaye ug ang babaye alang sa lalaki.

"Si Matsay uyab na siya sa akong ex nga bayot sa una, kay nahigugma man sab kog bayot," pung ni Jopay, kinsa mao si Jefty Suansing, usa ka beautician, nga daw di mabuhi kung wala kanunay ang lipstick ug mga pampa-byuti diha sa kiliran.

Walay nahimo ang mga kabanay ni Matsay human nangatubang si Jopay ngadto kanila, nga pula kaayo ang ngabil sa lipstick ug nagka-foundation kinsa miangkon sa tinuod nga pinitik sa iyang kasingkasing.

Ang pamilya ni Jopay, midawat sila ug nalipay sa nahitabo human nahukman sa iladong beautician nga mopahiluna na siya sa kinabuhing minyo.

"Gidawat nako si Jopay kay buotan siya, ug nakita nako nga gihigugma ko niya, walay bisan usa nga mopugong sa among paghigugmaay, kung ani man ko, ug ingon ana siya, kinasingkasing namo nang gidawat sa usa'g usa," mahigugmaong mga pulong nga gisulti ni Matsay.

Sa paspas nga dagan sa panahon, ang ilang panag-uban sa salag sa relasyon, nagbunga kini og usa ka himsog nga batang lalaki.

"Murag natulog lang ko, tapos pagmata nako kini na ang nahitabo, kini ang tinuod nga gugma, walay gipili, as long as nagkahigugmaay mo, ug malikayan ang away ninyong duha kung gipapuyo ninyo sa kasingkasing ang love," sulti ni Jopay.

Taliwala sa ilang panag-uban di malikayan nga dunay daghang mga pagbiay-biay gumikan sa ilang kahimtang, apan kining tanan mao na hinuon ang nakapadasig kanila ug ilang gipamatud-an nga ang gugma ngari sa kalibutan, di moila kung unsa ang estado sa pagkatawo, kung unsa ang sitwasyon sa matag kasingkasing -- ang kinahanglan napabati nila sa matag-usa ang gugma nga way bisan usa nga kondisyon.

"Taga Kapalong si Matsay pero tungod kay ang gugma gyud ang magdala nimo bisan asa paka nga dapit, adtuon gyud ka ug magkasinabot gyud mo, ug diha na mahitabo ug madungagan ang tumang gugma," dugang pagpadasig ni Jopay.

Sa kasamtangan, si Matsay anaa nagpuyo sa balay nila Jopay sa Rosemary, Agdao, Davao City, samtang si Jopay beautician sa buntag, stand-up comedian sa gabii.

Usa lamang sila Jopay ug Matsay ang nagpamatuod nga ang tinuod nga gugma sa kalibutan wala gyuy gipili, bisan tomboy man ang ma-asawa sa usa ka bayot, magpadayon sila sa ilang mga matam-is nga pagsabot sa gugma.

++++

Kini ang kinatibuk-ang istorya sa teaser nga video sa Valentine's Day Special sa SuperBalita Davao nga gi-post sa SuperBalita Facebook page nga miani og 15,791 views ug daghang mga comments ug shares gikan alas 2:20 sa hapon kagahapon.


VIEW COMMENTS