SECTIONS
Wednesday , May 23, 2018

Trillanes non grata sa Davao

ANG 18th Council sa Davao City miaproba kagahapon, Pebrero 13, sa resolusyon labot kang Senator Antonio Trillanes IV ug New York-based philanthropist Loida Nicolas Lewis isip mga persona non grata sa siyudad.

Si Davao City Vice Mayor Bernard Al-ag, sa iyang privilege speech, miduso sa pagdeklara ni Trillanes nga persona non grata sa pagpakatag og sayop nga pahayag nga ang Davao City mao ang labing delikado nga siyudad sa nasud.

Ang senador nagkanayon nga ang Davao City mao ang "number one in murder, number two in rape and Davao City is the most dangerous city of the Philippines" sa iyang pagpamulong sa gawas sa nasud.

"Declaring the city is the most dangerous city in the Philippines is not acceptable! This is an insult to the 1.6 million Dabawenyos who are working hard every day to make our city safe," suma ni Al-ag sa iyang speech.

Si Al-ag usab nagkondena sa paghulagway sa senador nga ang mga Dabawenyo gi-brainwashed sa mga Duterte nga ang Davao City mao ang labing luwas nga siyudad sa kalibutan.

Siya nagkanayon nga ang maong pahayag "mockery" alang sa mga Dabawenyo.

Si Al-ag midugang nga si Trillanes miadto sa Estados Unidos aron ipakita nga ang Davao City usa ka delikadong lugar, ug usa ka dapit nga daghang kriminal, siyudad sa mga mamumuno, ug siyudad sa mga rapists.

Si Al-ag nagkanayon nga ang Dabawenyo nasuko sa maong mga pulong ug aksyon sa senador mao nga di siya welcome sa Davao City.

"Mr. Trillanes, we do not need you here in Davao City. You are unwelcome and unwanted in our city of Davao. You have not done anything good at all to our city," suma sa bise mayor.

Ang vice mayor nagtumbok nga ang Seal of Good Local Governance (SGLG) nga gihatag sa siyudad nga gipirmahan ni kanhi Department of Interior Local Government Mar Roxas nagsalikway sa report sa istatistika sa Philippine National Police sa 2015 nga nahimong basehan sa deklarasyon ni Trillanes.

Siya nagkanayon nga di molampus si Trillanes sa pagguba sa siyudad lakip na ni Pangulong Rodrigo Duterte.


VIEW COMMENTS