SECTIONS
Monday , May 28, 2018

Mga mananagat gihataga’g tabang

KAPIN sa usa ka libo ka mga mananagat nga wala makapanagat sulod na sa tulo ka adlaw tungod sa bagyong Basyang gihatagan og hinabang sa siyudad sa Talisay.

Si Mayor Eduardo Gullas personal nga mitunol sa tulo ka kilong bugas ug linatang pagkaon sa mga mananagat.

Matod sa mayor nga maayo na lang nga dunay malung-ag ang mga manana­gat nga wala makapanagat tungod sa dili maayong pana­hon.

Unang nakapahimulos ang Barangay Tanke nga aduna’y kapin 800 ka mga mananagat ang nakapahimus sa hinabang.

Samtang gisunod barangay Cansojong ug Poblacion nga aduna’y 65 ka indibidwal nga nakadawat samtang 93 sa Pooc.

Si Felipa Solana, pangu sa City Social Welfare and Development (CSWD) miingon nga karong adlawa ang barangay San Roque na usab unya ang ilang hatagan.

Nasayra nga ang gibasihan sa paghatag mao ang listahan nga anaa narehistro sa nagkadaiyang organisasyon nga nagbase sa ilang siyudad.

Nagkanayon si Gullas nga kini magpadayon ang pagtabang sa bisan unsang sector dili lang ang mga mananagat basta adunay mga katalagman nga mahitabo.

Samtang gipahibawo sa pangulo sa City Disaster Risk Reduction and Management Office (CDRRMO) Alvin SAntillana nga aduna silay upat ka pamilya sa Barangay Lagtang ang gipabakwit sa kabalaka nga mahugno ang koral nga naa sa ibabaw sa ilang panimay tungod sa bagyong Basyang.

Iyang gipasabot nga kadtong upat ka pamilya namakwit gumikan kini sa kahadlok nga mubigay na gyud hinuon ang koral o gihimong riprap nga proyekto sa Department of Public Works and Highways (DPWH).

Hinuon, gitataw ni Santillana nga sa bagyong Basyang way pagsaka sa tubig sa mga sapa ug walay natala nga landslide. Sa kinatibuk-an, wa­lay dan­yos si 'Basyang' sa Talisay, apan padayon silang nag-monitor sa dagan sa panahon.


VIEW COMMENTS