SECTIONS
Monday , May 28, 2018

2 anyos gilugos, gipatay

DUNA nay mga persons of interest ang Tagum City Police Station labot sa paglugos ug pagpatay sa 2-anyos nga batang babaye nga napalgan sa sagbutan sa Purok 12, Barangay San Miguel, Tagum City, Martes sa hapon.

Sumala ni Tagum City Police Office spokesperson Senior Inspector Anjanette Tirador nga nagpadayon ilang pagsukit-sukit sa ilang mga persons of interest aron masayran ug matudlo ang naghimo sa brutal nga krimen.

"Padayon nato sila nga gisukit-sukit karon, ug sa sunod nga mga adlaw, natumbok nato ang suspetsado aron makapanubag sa krimen nga iyang gihimo," ingon ni Tirador sa SuperBalita pinaagi sa telepono kagahapon, Pebrero 14.

Gibutyag sab sa opisyal nga gituohang gilugos una ang 2-anyos sa wa pa gipatay dayon gilabay sa sagbutan sa Purok 12, Barangay San Miguel.

"Posible nga gipanamastamasan una gipatay, ug makompirma nato kini paggawas na medico legal, nahuman naman ang autopsy, karon [kagahapon, Miyerkules]," suma niya.

Nakadani sab og atensyon sa kabalaka ug kasuko sa mga netizens sa social media nga Facebook ang hulagway diin gihaya ang bata sa stage sa usa ka barangay sa Tagum City.

Sanglit ang inahan ug amahan sa biktima mga basurero lamang ug wala sab silay balay, sa stage nila kini gihaya, apan ang Tagum City Police ug ang pipila ka opisyal sa siyudad mihimo og lakang nga mahaya kini sa punerarya.

"Nangayo ta og tabang uban sa Tagum City Police ug sa buhatan ni Secretary Bong Go ug kang Presidente Duterte gibalhin ang haya, naa na karon sa usa ka punerarya sa Barangay La Filipina," dugang ni Tirador.

Sa kasamtangan, gipalawman sa Tagum City Police Station ang imbestigasyon sa krimen. (Jeepy P. Compio)


VIEW COMMENTS